Prajakta Mali Visits Gadkari's House : मराठी सिनेसृष्टीत स्वत:च्या सौंदर्याने आणि अभिनयाने चाहत्यांच्या मनावर राज्य करणारी अभिनेत्री प्राजक्ता माळी. आणि राजकारणातील चर्चित व्यक्तिमत्व म्हणजे केंद्रिय मंत्री नितीन गडकरी. योगायोगाने या दोघांची भेट घडली. प्राजक्ता माळीने तिच्या इन्स्ट्राग्रामवर पोस्ट शेअर केली आहे. या पोस्टमध्ये तिने गडकरींसोबतच्या भेटीतील अनुभव थोडक्यात शेअर केलाय.

प्राजक्ता माळी वेगवेगळ्या कारणाने कायम चर्चेत असते. सोशल मीडियावरही ती कायम अॅक्टिव्ह असते. तिच्या साड्यांची चर्चा कायम महिलांमध्ये दिसून येते. अलीकडेच तिने तिच्या इन्स्ट्राग्राम अकाउंटवर एक पोस्ट शेअर केलेली आहे. या पोस्टमध्ये तिने गडकरींसोबत झालेल्या भेटीनंतर त्यांच्याकडून भेट म्हणून मिळालेल्या साडीचा उल्लेख केलाय.

नागपूरला एका कार्यक्रमानिमित्त प्राजक्ता आणि गडकरींचा एकाच मंचावर उपस्थित राहण्याचा योग काही कारणाने जुळून येता येता राहिला. त्यावेळी प्राजक्ताने कार्यक्रमाच्या आयोजकांना एक छोटीशी विनंती केली होती. ती अशी की,"सहज गडकरी साहेबांची भेट शक्य झाल्यास मला फार आवडेल." हे कळताच गडकरींनी तात्काळ प्राजक्ताला वेळ दिला.

या भेटीत महाराष्ट्राच्या हास्यजत्रेतील काही पुढील कार्यक्रम, प्राजक्तराज, समृद्धी महामार्ग अशा बऱ्याच विषयांवर चर्चा झाली. यावेळी गडकरी प्राजक्ताची हास्यजत्रा बघतात हे कळल्यानं तिचा आनंद द्विगुणीत झाला. प्राजक्ताला यावेळी निघताना गडकरींनी यावेळी त्यांच्या घरातील देवीचे दर्शन घ्यायला लावले. सोबतच त्यांच्या कामावर लिहीलेली ८-९ पुस्तकं दिली.

विशेष म्हणजे या भेटीत गडकरींनी प्राजक्ताला नैसर्गिक कापसापासून बनवलेली खादी साडी दिली. ही साडी प्राजक्ताने विजयादशमीच्या उत्सवातसुद्धा नेसली होती. या भेटवस्तूबाबत प्राजक्ताने तिच्या पोस्टमध्ये खास उल्लेख केला आहे. "आयुष्यभर स्मरणात राहील अशा या भेटीसाठी वेळ दिल्याबद्दल नितीनजींचे मनापासून आभार." असे लिहीत तिने गडकरींचे आभार मानले आहे.