अश्लील चित्रफितनिर्मिती आरोपप्रकरणी अटकेत असलेल्या व्यावसायिक आणि अभिनेत्री शिल्पा शेट्टीचा पती राज कुंद्राच्या पोलीस कोठडीत चार दिवसांची वाढ करण्यात आली आहे. राजला २३ जुलैपर्यंत पोलीस कोठडी सुनावली होती. त्यानंतर आज (शुक्रवारा) त्याला कोर्टात हजर करण्यात आलं. पोलिसांनी कुंद्राच्या पोलीस कोठडीत वाढ करण्याची मागणी न्यायालयासमोर केली असता ती मान्य करण्यात आली. राज कुंद्रा आणि दुसरा आरोपी रायन जॉन मायकल थार्प या दोघांची २७ जुलैपर्यंत पोलीस कोठडीत रवानगी करण्यात आली आहे.

राज कुंद्रा आणि रायन थार्पचा लॅपटॉप पोलिसांनी जप्त केला असून त्यातील डेटामधून हॉटशॉट्स या अ‍ॅपचे ५१ व्हिडीओ हाती लागले. तर हॉटशॉट्स हे अ‍ॅप डेव्हलप करणाऱ्या साक्षीदाराने ते अश्लील असल्याची माहिती दिली. फेब्रुवारी महिन्यात पोलिसांनी कारवाई केल्यानंतर रायन थार्पने मोठ्या प्रमाणात डेटा नष्ट केला होता. युट्यूबने या अ‍ॅपवरून डाऊनलोड केलेले व्हिडीओ नष्ट करून हे अ‍ॅप युट्यूबवर बंद केल्याची नोटिस बजावली होती. ती नोटिस पोलिसांच्या हाती लागली आहे. 'एच अकाऊंट', 'एच ऑपरेशन' आणि 'एच टेक्निकल' या तीन व्हॉट्सअप ग्रुपमधील व्यक्तींची चौकशी होणे गरजेचे आहे. राज कुंद्राच्या येस बँकमधील खात्यात नियमितपणे मोठ्या प्रमाणात परदेशातून रक्कम जमा झाली आहे. या रकमेचाही तपास करणं गरजेचं आहे. त्यामुळे राज कुंद्राच्या पोलीस कोठडीत सात दिवसांची वाढ करण्यात यावी, अशी मागणी गुन्हे शाखेच्या पोलिसांनी कोर्टात केली.

फेब्रुवारी महिन्यात मढ परिसरातल्या एका बंगल्यावर टाकलेल्या छाप्यामध्ये अश्लील चित्रपट निर्मिती सुरू असल्याची माहिती मुंबई पोलिसांना कळाली. या प्रकरणाच्या तपासादरम्यान राज कुंद्राचं नाव समोर आलं. आतापर्यंत या प्रकरणात १२ जणांना अटक करण्यात आली आहे. इतर दहा आरोपी हे जामिनावर मुक्त आहेत.