कोरोनाच्या दुसऱ्या लाटेत मनोरंजन विश्वातील अनेक कलाकारांनी आपले प्राण गमावले. अशातच लोकप्रिय मालिका 'रामायण'मध्ये Ramayan रावणाची भूमिका साकारणारे अभिनेते अरविंद त्रिवेदी Arvind Trivedi यांच्यासुद्धा निधनाची चर्चा सोशल मीडियावर होत आहे. अरविंद यांचं कोरोनाने निधन झाल्याची अफवा सर्वत्र पसरली असतानाच आता मालिकेतील त्यांचे सहकलाकार सुनील लहरी Sunil Lahri यांनी त्यावर स्पष्टीकरण दिलं आहे. रामायणात लक्ष्मणाची भूमिका साकारणारे सुनील लहरी यांनी इन्स्टाग्रामवर पोस्ट लिहित अरविंद यांच्या निधनाचं वृत्त खोटं असल्याचं स्पष्ट केलं आहे. (ramayan ravan fame arvind trivedi death rumours laxman aka sunil lahiri clarifies)

सुनील लहरी यांची पोस्ट

अभिनेते सुनील यांनी अरविंद यांचा रावणातील भूमिकेतला एक फोटो पोस्ट केला आहे. तर दुसऱ्या फोटोमध्ये सुनील आणि अरविंद एकमेकांना मिठी मारताना दिसत आहेत. हे फोटो शेअर करत सुनील यांनी लिहिलं, 'कोरोनामुळे आजकाल सतत वाईट बातम्या ऐकायला मिळत आहेत. त्यातच अरविंद त्रिवेदी यांच्याबद्दल खोटी बातमी पसरविणाऱ्यांना माझी विनंती आहे की त्यांनी अफवा पसरवू नये. देवाच्या कृपेने अरविंदजी ठीक आहेत आणि देव त्यांना नेहमी निरोगी ठेवो ही प्रार्थना करतो.'

हेही वाचा : 'छिछोरे'मधील अभिनेत्री अभिलाषा पाटील यांचे कोरोनाने निधन

सोशल मीडियावर पोस्ट लिहित सुनील यांनी अरविंद यांच्या निधनाच्या चर्चांना पूर्णविराम दिला आहे. त्यांच्या या पोस्टवर रामायणात सीतेची भूमिका साकारणाऱ्या अभिनेत्री दीपिका चिखलिया यांनीसुद्धा हात जोडलेले इमोजी पोस्ट करत त्यांचे आभार मानले आहेत.