अयोध्या : रामानंद सागर यांची ‘रामायण’ ही मालिका नव्वदच्या दशकात घराघरांत भक्तिभावाने पाहिली जात होती. या मालिकेत रामाची भूमिका करणारे अरुण गोविल, सीता झालेल्या दीपिका चिखलिया आणि लक्ष्मणाचे काम करणारे सुनील लाहिरी हे रामलल्लाच्या प्राणप्रतिष्ठेसाठी सध्या अयोध्येत पोहचले आहेत.

अयोध्येत पोहोचल्यानंतरचे त्यांचे व्हिडिओ सोशल मीडियावर व्हायरल झाले आहेत. यात दीपिका यांनी लाल रंगाची साडी तर अरुण गोविल आणि लाहिरी यांनी पिवळ्या रंगाचे कुर्ते परिधान केले आहेत.

एका हिंदी वाहिनीशी बोलताना लाहिरी म्हणाले की, अयोध्येच्या या रूपावर विश्‍वास बसत नाही. दोन वर्षांपूर्वी येथे मी चित्रीकरणासाठी आलो होतो. खूप काही बदल झाला आहे. येथील हवेतून आपल्याला एक ऊर्जा मिळते. अयोध्येतील रस्त्यांच्या कडेला असलेली दुकाने आणि घरांतून भक्तीचे वातावरण दिसत आहे. शहर खूप स्वच्छ झाले आहे.