Jharkhand actress riya kumari shot dead on a highway: टीव्ही मनोरंजन विश्वात आणखी एका घटनेनं साऱ्या देशाचे लक्ष वेधून घेतले आहे. प्रसिद्ध अभिनेत्री तुनिषा शर्माच्या आत्महत्यानंतर पुन्हा एकदा धक्कादायक हत्याकांड समोर आले आहे. त्यामध्ये रिया कुमारी नावाच्या अभिनेत्रीची हत्या करण्यात आली आहे.

मुळची झारखंडची असणाऱ्या रिया कुमारीचा चाहतावर्ग मोठा आहे. सोशल मीडियावर देखील ती नेहमीच चर्चेत असते. तिची गोळ्या घालून हत्या करण्यात आली आहे. या घटनेनं तिच्या चाहत्यांना मोठा धक्का बसला आहे. ती पती प्रकाश कुमारसोबत प्रवास करत होती. दरम्यान काही अज्ञातांनी तिच्यावर गोळीबार केला. त्यामध्ये तिचा मृत्यु झाला आहे. रियाच्या पतीकडून बळजबरीनं पैसे घेण्यासाठी त्या गुंडांनी झटापट केल्याचे दिसून आले आहे.

Also Read - जोखमीचे भान राखूनच करा SIP मध्ये गुंतवणूक

पतीला गुंड मारहाण करत असतानाच त्या हल्लेखोराची गोळी रियाला लागली आणि त्यात तिचा मृत्यु झाल्याची माहिती सुत्रांनी दिली आहे. एकीकडे प्रसिद्ध अभिनेत्री तुनिशा शर्माचे प्रकरण वादात असताना त्यानंतर घडलेल्या रियाच्या हत्याकांडानं पुन्हा एकदा वातावरण तापले आहे. झारखंड मध्ये राहणारी रिया कुमारी ही एक अभिनेत्री असून ती लोकप्रिय युट्युबर देखील आहे.

नेमकं झालं काय?

पश्चिम बंगालच्या एका हायवेवर ही थरारक घटना घडली आहे. रिया कुमारी ही तिच्या पतीसोबत कारनं प्रवास करत होती. त्यावेळी काही अज्ञात हल्लेखोरांनी त्यांची कार अडवली. आणि त्यांनी रियाच्या पतीकडे पैशांची मागणी केली. यावेळी त्यांची बाचाबाची झाली. त्यांच्यातील वाढता वाद पाहून रियानं मध्यस्थी करण्याचा प्रयत्न केला.

गुंडांनी रियाच्या पतीला मारहाण करण्यास सुरुवात केली. त्यांना काही करुन पैसे हवे होते. नाहीतर ते जीवे मारण्याची धमकीही देत होते. त्याचवेळी रियानं पतीला वाचविण्यासाठी प्रयत्न केला असता गुंडांनी तिच्यावर हल्ला केला. त्या गोळीबारात रिया जागीच ठार झाल्याचे सांगण्यात आले. यावेळी त्यांच्यासोबत त्यांची दीड वर्षाची मुलगीही कारमध्ये होती.