JR NTR birthday : काही दिवसांपूर्वी जर 'ज्युनियर एनटीआर'(junior NTR) हे नाव घेतलं असतं तर कदाचित आपल्यापैकी अनेकांना ते नवीन वाटलं असतं पण 'आरआरआर' (RRR) आला आणि ज्युनिअर एनटीआर हे नाव जगभरातल्या कानाकोपऱ्यात पोहचलं. दाक्षिणात्य चित्रपट सृष्टीत काम करणाऱ्या या अभिनेत्याने सध्या सर्वांनाच वेड लावलं आहे. आज आपल्यापुढे सुपरस्टार म्हणून वावरणाऱ्या या अभिनेत्यावर एकेकाळी बालविवाहाचा गुन्हा दाखल करण्यात आला होता. आज ज्युनिअर एनटीआर चा वाढदिवस. त्यानिमित्ताने ही खास आठवण... (jr NTR marriage controversy )

अभिनेता नंदमुरी तारक रामा राव (actor nandmuri tarak rama rao) म्हणजेच 'ज्युनियर एनटीआर'चा आज ३९ वा वाढदिवस. 'स्टूडेंट नं 1', 'राखी', 'सिम्हाद्री', 'टेंपर', 'प्रेमाथो', 'जनता गैराज' आणि 'बादशाह' यांसारखे हिट चित्रपट देणाऱ्या ज्युनियर एनटीआरने आपल्या अभिनयाने चाहत्यांना भुरळ घातली. आणि नुकत्याच येऊन गेलेल्या आरआरआर ने तर अक्षरशः वेड लावलं. या सुरपस्टारवर अल्पवयीन मुलीशी लग्न केल्याप्रकरणी बालविवाहाचा आरोप झाला होता.

ही गोष्ट आहे २०११ ची. ज्युनियर एनटीआरने एका तेलगू चॅनलच्या मालकाची मुलगी लक्ष्मी प्रणाथी सोबत लग्नगाठ बांधायचं ठरवलं. प्रणाथी ही उद्योगपती नारने श्रीनिवास राव यांची मुलगी. तिची आई ही आंध्र प्रदेशचे माजी मुख्यमंत्री चंद्राबाबू नायडूंची भाची. २०११ साली त्यांनी साखरपुडा केला . पण त्यावेळी लक्ष्मी फक्त १७ वर्षांची होती. त्यामुळे या लग्नाची वार्ता कळताच विजयवाडामधील वकील सिंगुलुरी शांति प्रसाद यांनी ज्युनिअर एनटीआर विरोधात बालविवाह कायद्याअंतर्गत तक्रार दाखल केली.

एनटीआर, चंद्राबाबू नायडू, श्रीनिवास राव यांना या प्रकरणी नोटीसही बजावण्यात आली होती. मात्र लवकरच प्रणाथी लग्नापर्यंत 18 वर्षांची होत असल्याचं सांगत तिच्या कुटुंबीयांनी स्पष्टीकरण दिलं आणि या वादावर पडदा पडला. पुढे काही महिने वाट पाहून ५ मे २०११ मध्ये लक्ष्मीसोबत विवाह केला. त्यावेळेस लक्ष्मीला १८ वर्ष पूर्ण झाली होती.सध्या ज्युनियर एनटीआर आणि लक्ष्मी सुखाने संसार करत असून त्यांना दोन मुलं आहेत. आणखी एका कारणावरूनही हे लग्न गाजलं होतं.असं म्हणतात हे लग्न दक्षिण भारतातल्या सर्वांत महागड्या लग्नांपैकी एक होतं. या लग्नावर त्यावेळी १०० कोटी रुपये खर्च केल्याची चर्चा होती.