राष्ट्रीय स्वयंसेवक संघाचे प्रमुख मोहन भागवत यांनी मंगळवारी सकाळी अभिनेते मिथुन चक्रवर्ती यांची भेट घेतली. मिथुन चक्रवर्ती यांच्या मुंबईतल्या निवासस्थानी त्यांनी भेट घेतली. या दोघांमध्ये जवळपास दीड तास चर्चा झाल्याचं समजतंय. आगामी पश्चिम बंगाल निवडणुकीच्या पार्श्वभूमीवर या भेटीला अधिक महत्त्व प्राप्त झाले आहे. मिथुन चक्रवर्ती हे भाजपमध्ये प्रवेश करणार की काय, अशाही चर्चा राजकीय वर्तुळात रंगल्या आहेत. 

या भेटीबाबत मिथुन चक्रवर्ती म्हणाले, "मोहन भागवत यांच्याशी माझं अध्यात्मिक कनेक्शन आहे. मी त्यांना लखनऊमध्ये भेटलो होतो आणि तेव्हा मुंबईत कधी आलात तर माझ्या घरी आवर्जून या असं आवाहन केलं होतं. त्यामुळे त्यांनी माझी भेट घेतली." यावेळी मिथुन चक्रवर्ती यांनी भाजपमध्ये प्रवेशाच्या चर्चांना फेटाळलं. "कोणतेही अंदाज वर्तवू नका. त्याबद्दल अद्याप काहीही चर्चा झाली नाही," असं ते पुढे म्हणाले. 

हेही वाचा : शूटिंगदरम्यान जॉन अब्राहमला दुखापत; पोस्ट केला व्हिडीओ

२०१९ मध्ये मिथुन चक्रवर्ती यांनी राष्ट्रीय स्वयंसेवक संघाच्या मुख्यालयात मोहन भागवत यांची भेट घेतली होती. २०११६ पर्यंत ते तृणमूल काँग्रेसतर्फे राज्यसभा सदस्य होते होते. मात्र आरोग्याच्या कारणांमुळे सदनात सतत अनुपस्थित राहिल्याने त्यांनी राज्यसभा सदस्यत्वाचा राजीनामा दिला. तेव्हापासून ते राजकारणापासून दूर आहेत.