मुंबई : सपना चौधरी हे नाव कोणत्याही व्यक्तीसाठी नवीन राहिलेलं नाही. आपल्या दिलखेचक अदा आणि डान्सच्या तालावर सपनाने अनेकांना ताल धरायला लावला आहे. त्यामुळे या हरयाणवी डान्सरचे आज तुफान चाहते असल्याचं पाहायला मिळतं. सपना लवकरच एका कार्यक्रमाच्या माध्यमातून छोट्या पडद्यावर पदार्पण करणार आहे. 'मौका ए वारदात' या कार्यक्रमाचं सूत्रसंचालन करताना ती पाहायला मिळणार आहे. गुन्हेगारी घटनांवर भाष्य करणाऱ्या या कार्यक्रमाच्या निमित्ताने सपनाने अलिकडेच एका मुलाखत दिली. या मुलाखतीत तिने समाज आणि तिच्या करिअरविषयी अनेक गोष्टींचा खुलासा केला. इतकंच नाही तर तिने ट्रोलर्सलादेखील सडेतोड उत्तर दिलं आहे. 'मौका ए वारदात' या कार्यक्रमात काही महिलांवरील अन्याय, अत्याचाराच्या घटनांवर भाष्य करण्यात येणार आहे.  या कार्यक्रमाच्या माध्यमातून सपना पहिल्यांदाच छोट्या पडद्यावर झळकणार आहे.

"खरं तर या सगळ्या प्रकारात मला पूर्णपणे सरकारची चूक आहे असं वाटतं. कारण जोपर्यंत चुकीचं वर्तन करणाऱ्या स्त्री किंवा पुरुष  जे कोणी असतील त्यांना कठोर शिक्षा होत नाही तोपर्यंत बदल घडणार नाही. दोन- चार जणांना शिक्षा झालीही असेल. परंतु,  एखादी कठोर शिक्षा झाली की लोकांच्या मनात आपोआप भीती निर्माण होईल. मला तर वाटतं एक तरी अशी शिक्षा व्हावी ज्यामुळे लोकांच्या मनात भीती निर्माण होईल. जर बलात्कार करणारी व्यक्ती असेल तर त्याला पहिले चप्पलेने मारलं पाहिजे, त्यानंतर त्याला फरफटत नेत त्याला जीवंतपणे मृत्यूची शिक्षा दिली पाहिजे. दरवेळी कोणताही गुन्हा घडला की मुलींना दोष दिला जातो. तिने कपडेच चुकीचे परिधान केले होते?, ती रात्री उशीरापर्यंत घराबाहेर का राहते? असे प्रश्न विचारले जातात. इतकंच नाही तर तुमच्या कलेवरदेखील बोट ठेवलं जातं", असं सपना म्हणाली.

हेही वाचा : खुशखबर! आता इंजिनिअर होण्यासाठी गणित, भौतिकशास्त्राची नाही गरज 

पुढे ती म्हणते, "अश्लीलता हा लोकांच्या मानसिकतेचा भाग आहे. हे त्यांच्या डोक्यात फिक्स बसलं आहे. जर माझी डान्स करण्याची स्टाइल अश्लील असेल, तर ब्युटी कॉन्टेस्टमध्ये बिकिनी परिधान करुन रॅमवॉक करणं अश्लीलपणा नाही का? मी तर संपूर्ण अंगभर कपडे परिधान करुन डान्स करते. मग बॉलिवूडमधील आयटम सॉन्ग्स असतात त्यातदेखील अभिनेत्री तोकडे कपडे परिधान करुन डान्स करतात तोदेखील मग अश्लीलपणाच झाला. हे असंच होत आलं तर तुम्हाला प्रत्येक ठिकाणी अश्लीलपणाच दिसून येईल. या सगळ्यांसोबत माझ्या डान्सची तुलना केली तर माझा डान्स कोणत्या दृष्टीने अश्लील झाला? यांच्या तुलनेत माझा डान्स फार साधा आणि व्यवस्थित आहे."

हेही वाचा : तब्बल 18 GB रॅम अन् बरचं काही! जाणून घ्या Asusच्या ROG Phone 5 चे दमदार वैशिष्ट्ये

दरम्यान, सपना चौधरी कायम सोशल मीडियावर व्यक्त होत असते. अनेकदा तिने समाजात घडणाऱ्या घटनांवर उघडपणे भाष्य केलं आहे. काही दिवसांपूर्वीच सपना बिग बॉस या रिअॅलिटी शोमध्ये सहभागी झाली होती. या शोमध्येदेखील ती तितकाच चर्चेचा विषय ठरली होती.