Seema Deo Passed Away News: मराठी मनोरंजन विश्वातील लोकप्रिय अभिनेत्री सीमा देव यांचं वयाच्या ८१ व्या वर्षी निधन झालंय. सीमा देव यांच्या निधनाने मराठी मनोरंजन विश्वातील अनेक कलाकारांनी हळहळ व्यक्त केलीय. अशातच मनोरंजन विश्वातील सर्वांचे लाडके अशोक मामा म्हणजेच अशोक सराफ यांनी सीमा देव यांना श्रद्धांजली वाहिली आहे.

अशोक सराफ यांनी वाहिली श्रद्धांजली

अभिनयाची जाण असलेली देखणी शालीन नटी गेली, पहिल्या रोल पासून नाव केलं होतं, मराठी सिनेसृष्टी त्यांनी गाजवली, स्वभावाने छान, मला तर मोठ्या बहिणी समान मानत होतो., अशा शब्दात अशोक सराफ यांनी सीमा देव यांना श्रद्धांजली वाहिली आहे.

अल्झायमर आजाराने ग्रस्त सीमा देव

81 वर्षीय अभिनेत्री सीमा देव यांनी त्यांच्या पन्नास वर्षांच्या कारकिर्दीत अनेक मराठी चित्रपटांमध्ये काम केले आहे. त्या अल्झायमर या आजाराने ग्रस्त होत्या. ‘सरस्वतीचंद्र’ (1968), ‘आनंद’ आणि ‘ड्रीम गर्ल’ (1977) या हिंदी चित्रपटांमध्येही सीमा देव यांनी काम केले आहे. त्यांच्या निधनाच्या बातमीने मनोरंजन विश्वावर शोककळा पसरली आहे.

सीमा देव यांना अल्झायमरचा त्रास सुरु झाला होता. सीमा यांचा मुलगा अजिंक्य देव यांनी सोशल मीडियावर पोस्ट शेयर करत आई लवकर बरी होऊ दे यासाठी प्रार्थना करण्याचं आवाहन त्यांनी चाहत्यांना केलं होतं. गेल्या काही काळापासून सीमा त्यांच्या मुलासोबत मुंबईतील वांद्रे येथे राहत होत्या.