क्रुझवरील अमली पदार्थ पार्टीप्रकरणी अटकेत असलेला अभिनेता शाहरुख खानचा Shah Rukh Khan मुलगा आर्यनच्या Aryan Khan जामीन याचिकेवर येत्या २६ ऑक्टोबर रोजी उच्च न्यायालयात सुनावणी होणार आहे. विशेष न्यायालयाने जामीन देण्यास नकार दिल्यानंतर आर्यनने त्या निर्णयाविरोधात उच्च न्यायालयात धाव घेतली आहे. बुधवारी शाहरुखने आर्थर रोड कारागृहात जाऊन मुलाची भेट घेतली. आर्यनच्या अटकेनंतर पहिल्यांदाच बापलेकाची भेट झाली होती. आता सोशल मीडियावर शाहरुखचा एक जुना व्हिडीओ व्हायरल होत आहे. या व्हिडीओमध्ये तो आर्यनविषयी बोलताना दिसत आहे. 'कभी खुशी कभी गम' या चित्रपटाच्या प्रमोशननिमित्त शाहरुखने जया बच्चन आणि अमिताभ बच्चन यांच्यासोबत करण जोहरच्या चॅट शोमध्ये हजेरी लावली होती. तेव्हा करणने शाहरुखला त्याच्या मुलाबद्दल प्रश्न विचारला होता.

तुझा मुलगा मोठा होऊन अभिषेकसारखा बनावा, यासाठी तू काही प्रयत्न करत आहेस का, असा प्रश्न करण जोहरने शाहरुखला विचारला. त्यावर शाहरुख म्हणाला, "असं घडल्यास माझ्यासाठी ही अभिमानाची बाब असेल आणि त्याच्यासाठीसुद्धा. आता तो १०० मीटर धावणी स्पर्धेतही पहिल्या क्रमांकावर नाही आला तर मला वाईट वाटतं. इथूनच सुरुवात होते आणि हा प्रत्येक पालकांच्या आयुष्यातील एक भाग आहे असं मला वाटतं." शाहरुखचं हे बोलणं ऐकून पुढे जया बच्चन म्हणतात, "शाहरुखचा मुलगा स्पर्धेत बाजी मारू शकला नाही, ही बाब जास्त अधोरेखित केली जाते, म्हणून ते जास्त त्रासदायक असतं. यात मुलांची काहीच चूक नाही. पण एका दृष्टीने हे चांगलंसुद्धा आहे. अमिताभ बच्चन, शाहरुख यांच्या मुलांनी अपयशाला, संघर्षलाही सामोरं जावं. कारण त्याशिवाय त्यांना त्याचं महत्त्व समजणार नाही." जया बच्चन यांच्या या मतावर शाहरुख गमतीशीरपणे म्हणतो, "त्याला संघर्ष करावा लागू नये यासाठी मी जास्त प्रयत्न करतोय. कारण तो आता काय करतोय याची फार कोणाला काळजी नाही."

'कभी खुशी कभी गम' या चित्रपटात शाहरुखने अमिताभ आणि जया यांच्या मुलाची भूमिका साकारली होती. या जुन्या व्हिडीओवर नेटकऱ्यांनी आर्यनबद्दल प्रतिक्रिया दिल्या आहेत. काहींनी जया बच्चन यांच्या वक्तव्याशी सहमती दर्शविली आहे. सुपरस्टारचा मुलगा असल्याची किंमत आर्यनला मोजावी लागतेय, असं मत काहींनी मांडलंय. तर काहींनी शाहरुखबद्दल सहानुभूती व्यक्त केली आहे.