शाहिद कपूर म्हटलं की हॅन्डसम हिरो हे शब्द ओठांवर आलेच पाहिजेत. आज वयाच्या चाळीशीतही पोरींना आपल्या प्रेमात सहज पाडायची धमक शाहिदमध्ये आहे बरं का. त्याच्या आजवरच्या अनेक सिनेमातनं रोमॅंटिक आणि रफ-टफ लूक साकारणारा शाहिद प्रत्येक भूमिकेत तितकाच फेव्हरेट बनून जातो. त्यानं साकारलेला 'कबिर सिंग' भरपूर शिव्या देणारा,व्यसनं असणारा असला तरी अनेक तरुणींना त्याच्या लूकने आणि अभिनयानं घायाळ करून गेला असं म्हटलं तर चुकीचं नक्कीच ठरणार नाही. आता यावरनं एक मात्र नक्की होतंय की शाहिदसाठी त्याचे लूक्स किती महत्त्वाचे असतील.

शाहिदचा(Shahid Kapoor) आता 'जर्सी' सिनेमा प्रदर्शित होणार आहे. सिनेमाची काही गाणीही रिलीज करण्यात आली आहेत. या सिनेमात त्याच्यासोबत मृणाल ठाकूर आणि त्याचे वडील अभिनेता पंकज कपूरही आहेत. या सिनेमातलाही शाहीदचा लूक प्रत्येक मुलीच्या डोळ्यांना सुखावणारा आहे. पण हाच सिनेमा त्याच्यासाठी समोर संकट घेऊन येणारा ठरला होता हे आपल्यापैकी किती जणांना माहीत आहे. या सिनेमात शाहिद आपल्याला क्रिकेटरच्या भूमिकेत दिसणार आहे. तर आता क्रिकेट खेळायचं म्हटलं की क्रिकेटची बॅट आणि बॉल या गोष्टी आल्याच. तर असाच 'जर्सी'च्या सेटवर शाहिद शूटिंग करताना नाही तर वेळ घालवण्यासाठी क्रिकेट खेळत होता. आणि तेव्हाच बॉलचा असा काही दणका त्याच्या ओठांवर लागला की तो जागीच कोसळला.

त्याचा एक व्हिडीओ सध्या व्हायरल होतोय. सुरुवातीला फार लागलं नाही असं वाटून तो आणि त्याची टीम फक्त रुमालाने ओठाचं रक्त पुसत होते. पण जेव्हा रक्ताची धार सुरू होऊन संपूर्ण टी-शर्ट रक्ताने लाल झाला तेव्हा तिथे जमा झालेल्या सर्वांना त्या जखमेचं गांभीर्य कळंल आणि मग कुणीतरी म्हणालं,'डॉक्टरकडे जाऊया का?' त्या प्रसंगानंतर शाहिद बरा होईपर्यंत म्हणजे जवळ-जवळ महिनाभर शूटिंग थांबवण्यात आलं. शाहिदला २५ टाके पडले होते त्यामुळे आता त्याचे ओठ कसे दिसतील या टेन्शनमध्ये सगळे होते. पण बरा होऊन आलेल्या शाहिदला पाहून सगळे 'ऑल ओके' म्हणाले आणि शांतीचा नि:श्वास सोडला.