अभिनेता सिद्धार्थ शुक्लाच्या Sidharth Shukla निधनाचं दु:ख पचवणं अजूनही त्याच्या चाहत्यांसाठी सोपं नाही. सोशल मीडियावर दररोज त्याच्या आठवणी पोस्ट केल्या जातात. सिद्धार्थच्या निधनानंतर शहनाज गिल Shehnaaz Gill पूर्णपणे खचली आहे. काही दिवसांपूर्वीच शहनाजच्या वडिलांनी तिच्या नावाचा टॅटू हातावर काढला होता. त्यानंतर आता शहनाजच्या भावाने सिद्धार्थच्या चेहऱ्याचा टॅटू हातावर काढला आहे. सिद्धार्थची आठवण कायम स्वत:सोबत ठेवण्यासाठी शेहबाज बादेशाने हा टॅटू काढला आहे. त्याचा फोटो आणि व्हिडीओ त्याने सोशल मीडियावर पोस्ट केला आहे.

तुझ्या आठवणी तुझ्यासारख्याच खऱ्या असतील. तू नेहमी माझ्यासोबत जिवंत राहशील, आमच्या आठवणींमध्ये जिवंत राहशील, असं कॅप्शन त्याने या फोटोला दिलं आहे. हातावर सिद्धार्थचा चेहरा आणि त्याखाली शहनाज असं नाव लिहिलेलं या फोटोमध्ये दिसतंय. या फोटोच्या कॅप्शनमध्ये अनेकांनी कमेंट करत त्याला शहनाजची काळजी घेण्याचं आवाहन केलं आहे.

सिद्धार्थच्या जाण्यानं शहनाज मोठ्या मानसिक धक्क्यात आहे. तिला त्यातून बाहेर काढण्यासाठी तिची आई काळजी घेत आहे. सिद्धार्थ शुक्लाने वयाच्या ४०व्या वर्षी जगाचा निरोप घेतला. हृदयविकाराच्या तीव्र झटक्याने सिद्धार्थचे २ सप्टेंबर रोजी निधन झाले. 'बालिका वधू' या मालिकेमुळे घराघरात पोहोचलेला सिद्धार्थ 'बिग बॉस १३'चा विजेता ठरला होता.