छोट्या पडद्यावरील लोकप्रिय अभिनेत्री श्वेता तिवारीची मुलगी पलक तिवारी लवकरच बॉलिवूडमध्ये पदार्पण करणार आहे. पलक ही श्वेता आणि तिचा पहिला पती राजा चौधरी यांची मुलगी आहे. घटस्फोटानंतर पलक आईसोबत राहू लागली आणि आता तब्बल १३ वर्षांनंतर ती तिच्या वडिलांना भेटली आहे. मुलीला भेटल्यानंतर भावूक झालेल्या राजाने सोशल मीडियावर तिच्यासोबतचा फोटो पोस्ट केला. "१३ वर्षांनंतर मी माझ्या मुलीला भेटलो. हा माझ्यासाठी खूप खास क्षण आहे. याआधी तिला पाहिलं तेव्हा ती खूप लहान होती. आता ती खूप मोठी झाली आहे", असं राजा म्हणाला. 

मुलीच्या भेटीविषयी 'टाइम्स ऑफ इंडिया'ला दिलेल्या मुलाखतीत राजा म्हणाला, "मी आणि पलक व्हॉट्स अॅपद्वारे एकमेकांच्या संपर्कात होतो. मी तिला रोज गुड मॉर्निंगचा मेसेज पाठवायचो. पण आम्ही कधीच भेटलो नाही. मी माझ्या आई-वडिलांसोबत मेरठमध्ये राहतो. पण काही कामानिमित्त मी मुंबईला आलो होतो. मुंबईला आल्यावर मी पलकला फोन केला असता ती तिच्या चित्रपटासाठी तयारी करत असल्याचं समजलं. त्यातूनही तिने वेळ काढला आणि माझी भेट घेतली. जवळपास दीड तास आम्ही गप्पा मारत होतो. यावेळी आम्ही भूतकाळात घडलेल्या कोणत्याही गोष्टीबद्दल चकार शब्द काढला नाही. आमच्या दोघांच्याही आयुष्यातील हे नवीन पर्व आहे."

हेही वाचा : "तडजोड केल्याशिवाय काम मिळणार नाही"; अभिनेत्रीने उघड केला दिग्दर्शकांचा खरा चेहरा 

आयुष्यात मिळालेल्या या दुसऱ्या संधीबद्दल राजा चौधरीने आनंद व्यक्त केला. मुलीसोबतचं नातं पूर्वीसारखं ठीक करायची इच्छाने त्याने व्यक्त केली. यासाठी त्याने पूर्वाश्रमीची पत्नी श्वेता तिवारीचेही आभार मानले. राजा आणि श्वेता यांचा संसार सात वर्षे टिकला. त्यानंतर राजाला घटस्फोट देण्यासाठी श्वेताने सहा वर्षे संघर्ष केला. घटस्फोटानंतर श्वेताने अभिनेता अभिनव कोहलीशी लग्न केलं. मात्र त्याच्यासोबतही अनेक वादविवाद निर्माण झाले आहेत.