गरिबांचा तारणहार म्हणून बॉलीवूड अभिनेता सोनू सूद (Sonu Sood) ओळखला जातो. सोनूनं पुन्हा माणूसकीचा धर्म जपत पंजाबमध्ये एका तरुण मुलाचे प्राण वाचवले आहेत. त्याचं झालं असं की, अपघातात जखमी झालेले दोन तरुण त्यांच्या कारमध्ये अडकून पडले होते. त्यांना वाचवण्यासाठी तोपर्यंत कुणीही फिरकलं नव्हतं. तेव्हा सोनूची गाडी तिथनं जात असताना त्याचं लक्ष त्या अपघातग्रस्त गाडीकडे गेलं तेव्हा त्यानं आपली गाडी थांबवून त्या मुलांची मदत करण्यासाठी त्या दिशेने धाव घेतली. सोनूने सर्वप्रथम गाडीतील जखमी मुलांना बाहेर काढलं,त्यानंतर स्वतः त्या मुलांना उचलून आपल्या गाडीत ठेवलं. व तिथनं थेट हॉस्पिटल गाठलं. वेळेवर मदत मिळाली म्हणून त्या मुलांचे प्राण वाचले आणि त्यांच्यावरचा धोका टळला.

हा अपघात पंजाबनजीकच्या मोगा-बठिंडा रस्त्यावर झाला होता. रात्री उशिरा त्या तरुणांसोबत हा कार अपघात झाला होता. समोरासमोरुन भरधाव येणाऱ्या दोन कार एकमेकांवर आदळल्यानं हा अपघात झाला होता. पण ही टक्कर इतकी जबरदस्त होती की त्या तरुणांच्या गाडीचे सेंटर लॉक लागले गेले. त्यामुळे गाडीच्या आत ते दोन तरुण फसले. त्या तरुणांचे नशीब चांगलं होतं की सोनू सूदची गाडी तिथनं पास होत होती आणि त्यानं अपघात पाहिल्यावर गाडी थांबवली हे त्याहीपेक्षा महत्त्वाचं. सोनूने क्षणाचाही विलंब न करता किंवा आपल्याला दुखापत होईल याचा विचार न करता गाडीची काच तोडली अन् त्या गाडीतील जखमी तरुणांना गाडीच्या बाहेर काढले आणि हॉस्पिटलमध्ये उपचारांसाठी नेले.

सोनू आपल्या बहिणीच्या निवडणूक प्रचार फेरीनंतर पुन्हा मुंबईला परत जात होता. त्याचवेळी हा अपघात त्याच्या निदर्शनास आला. सोनूनं वेळीस मदत केल्यानं ते तरुण वाचले याची चर्चा सध्या सर्वत्र होत आहे. आणि सोनूच्या कामाचे कौतूकही होत आहे.