चित्रपटसृष्टीतील अमूल्य योगदानासाठी अभिनेते रजनीकांत यांना भारतीय सिनेजगतातील सर्वोच्च दादासाहेब फाळके पुरस्कार जाहीर करण्यात आला आहे. केंद्रीय माहिती आणि प्रसारण मंत्री प्रकाश जावडेकर यांनी पुरस्काराची घोषणा केली. अभिनेते, निर्माते आणि पटकथालेखक म्हणून त्यांची चित्रपटसृष्टीत दिलेलं योगदान हे अतुलनीय आणि अमूल्य असल्याचं जावडेकर यावेळी म्हणाले. 
 

रजनीकांत यांचा जन्म बंगळुरूमध्ये एका मराठी कुटुंबात झाला. त्यांचं खरं नाव शिवाजीराव गायकवाड आहे. चित्रपटसृष्टीत पाऊल ठेवण्याआधी त्यांनी 'बेंगळुरू मेट्रोपॉलिटन ट्रान्सपोर्ट कॉर्पोरेशन'मध्ये कंडक्टर म्हणून काम केलं होतं. रजनीकांत यांनी तामिळ, तेलुगू, कन्नड, मल्याळम, हिंदी, बंगाली भाषांतील चित्रपटांमध्ये भूमिका साकारल्या आहेत. चित्रपटसृष्टीत ते त्यांच्या स्टाईलसाठी विशेष ओळखले जातात. कंडक्टर असतानाही तिकिट देण्याच्या अनोख्या स्टाईलमुळे ते लोकप्रिय होते. अभिनयाच्या आवडीमुळे त्यांनी सुरुवातीला नाटकांमध्ये काम केलं. यासाठी त्यांनी कंडक्टरची नोकरी सोडली. एका नाटकादरम्यान प्रसिद्ध दिग्दर्शक के. बालाचंद्र यांनी रजनीकांत यांना पाहिलं आणि त्यांना चित्रपटाची ऑफर दिली. १९७५ मध्ये रजनीकांत यांनी 'अपूर्व रागंगल' या तामिळ चित्रपटातून कलाविश्वात पदार्पण केलं. या चित्रपटात त्यांनी खलनायकाची भूमिका साकारली होती. कमल हासन यांची मुख्य भूमिका असलेल्या या चित्रपटात त्यांनी केवळ १५ मिनिटांची भूमिका साकारली होती. 

हेही वाचा : किरण खेर यांना ब्लड कॅन्सर, भाजप सहकाऱ्याची माहिती

रजनीकांत यांचे केवळ देशभरात नाही तर जगभरात असंख्य चाहते आहेत. रुपेरी पडद्यावरील त्यांची स्टाइल, त्यांचा अॅटिट्यूड यांनी वेडावलेल्या चाहत्यांची संख्या लक्षणीय आहे. रजनीकांत हे पडद्यावर जितके स्टायलिश असतात, तितकेच साधे ते खऱ्या आयुष्यात वावरतात. आतापर्यंत त्यांनी दीडशेहून अधिक चित्रपटांमध्ये काम केलंय.