मुंबई: ड्रग्ज प्रकरणात (Drug case) अटक झालेला सुपरस्टार शाहरुख खानचा (Shahrukh khan) मुलगा आर्यन खान (Aryan khan) आज 'मन्नत' (Mannat) वर आहे. तब्बल २७ दिवसानंतर आर्यनची काल आर्थररोड कारागृहातून सुटका झाली. मन्नत बाहेर जमलेल्या शाहरुखच्या चाहत्यांनी फटाके फोडून, ढोल-ताशाच्या गजरात काल आर्यन खानचं जोरदार स्वागत केलं. आर्यनच्या सुटकेमुळे सध्या मन्नतवर आनंदाचं वातावरण आहे.

मुलाची सुटका झाल्यामुळे शाहरुख लवकरच प्रभादेवीच्या सिद्धिविनायक मंदिरात दर्शनासाठी जाऊ शकतो. शाहरुखच्या जवळ सूत्रांनी ही माहिती दिली आहे. बाप्पांचे आभार मानण्यासाठी शाहरुख सिद्धिविनायक मंदिरात येऊ शकतो.

शाहरुख दरवर्षी मन्नतवर कुटुंबीयांसोबत गणेशोत्सव साजरा करतो. मन्नतवर त्याने गणपतीची एक मुर्ती सुद्धा ठेवली आहे. सूत्रांनी ही माहिती दिली. शाहरुख सोशल मीडियावर फार सक्रिय नसतो. पण दरवर्षी घरच्या गणेशोत्सवाचे फोटो तो चाहत्यांसोबत शेअर करत असतो.

ड्रग्ज प्रकरणात अटक झालेल्या आर्यन खानला गुरुवारी मुंबई उच्च न्यायालयाने जामीन मंजूर केला. पण शुक्रवारी कायदेशीर प्रक्रिया पूर्ण व्हायला वेळ लागल्यानंतर आर्यनची सुटका शनिवारपर्यंत लांबली. अखेर काल सकाळी आर्यन तुरुंगातून सुटला. आता या प्रकरणात आर्यनला अटक करणारे समीर वानखेडे यांच्या अडचणी वाढल्या आहेत. ते मुंबई झोनचे प्रमुख आहेत.