अभिनेत्री आलिया भट्टच्या वाढदिवसानिमित्त तिच्या बहुप्रतिक्षित आणि बहुचर्चित 'RRR' या चित्रपटातील तिचा फर्स्ट लूक प्रदर्शित करण्यात आला आहे. 'बाहुबली' फेम दिग्दर्शक एसएस राजामौली या चित्रपटाचं दिग्दर्शन करत असून चित्रपटाच्या घोषणेपासूनच त्याची जोरदार चर्चा आहे. आलियाने सोशल मीडियावर तिचा फर्स्ट लूक पोस्ट केला असून 'सीता' असं कॅप्शनमध्ये लिहिलंय. चित्रपटात आलिया सीतेची भूमिका साकारतेय. भूमिकेला साजेसा असा तिचा लूक या पोस्टरमध्ये पाहायला मिळतोय. हिरवी साडी, त्यावर मोजके दागिने आणि रोखून ठेवणारी नजर.. असा आलियाचा हा फर्स्ट लूक आहे. वाढदिवसाच्या एक दिवस आधी आलियाने या चित्रपटाचा आणखी एक पोस्टर सोशल मीडियावर पोस्ट केला होता. यामध्ये भगवान श्रीरामाच्या मूर्तीसमोर एक स्त्री बसलेली पाहायला मिळतेय. या चित्रपटाच्या माध्यमातून आलिया तेलुगू चित्रपटविश्वात पदार्पण करतेय. 

आलियासोबतच या चित्रपटात सुपरस्टार चिरंजीवीचा मुलगा राम चरण, अजय देवगण आणि ज्युनिअर एनटीआर मुख्य भूमिकेत आहेत. १३ ऑक्टोबर २०२१ रोजी हा चित्रपट प्रेक्षकांच्या भेटीला येणार आहे. चित्रपटातील आलियाच्या भूमिकेविषयी चाहत्यांमध्ये प्रचंड उत्सुकता निर्माण झाली आहे. जवळपास १० भाषांमध्ये हा चित्रपट प्रदर्शित होणार आहे. 

हेही वाचा : नियम सर्वांसाठी सारखेच! कोविड नियमांचं उल्लंघन करणाऱ्या गौहर खानविरोधात गुन्हा दाखल

दिग्दर्शक एसएस राजामौली यांच्या 'बाहुबली' चित्रपटाला प्रेक्षकांचा जबरदस्ता प्रतिसाद मिळाला होता. त्यामुळे हा चित्रपटसुद्धा तितकाच भव्यदिव्य आणि 'लार्जर दॅन लाइफ' असेल अशी चाहत्यांची अपेक्षा आहे. याशिवाय आलिया 'ब्रह्मास्त्र' या आणखी एक बिग बजेट चित्रपटात मुख्य भूमिकेत दिसणार आहे. यामध्ये ती पहिल्यांदाच बॉयफ्रेंड रणबीर कपूरसोबत काम करणार आहे. अयान मुखर्जी दिग्दर्शित या चित्रपटात आलिया, रणबीरसोबतच अमिताभ बच्चन, डिंपल कपाडिया, नागार्जुन आणि मौनी रॉय यांच्याही महत्त्वपूर्ण भूमिका आहेत.