अभिनेता शाहरुख खानचा Shah Rukh Khan मुलगा आर्यनला Aryan Bail क्रुझवरील पार्टीप्रकरणी उच्च न्यायालयाने अखेर गुरुवारी जामीन मंजूर केला. आर्यनची आज (शुक्रवार) किंवा शनिवारी सुटका होऊ शकेल. आर्यनला जामीन मिळाल्यानंतर त्याची बहीण सुहानाने Suhana Khan सोशल मीडियावर खास फोटो पोस्ट करत आनंद व्यक्त केला. शाहरुख आणि आर्यन यांच्यासोबतचा लहानपणीचा फोटो तिने पोस्ट केला आहे. 'आय लव्ह यू' असं कॅप्शन तिने या फोटोला दिलं आहे. या फोटोंमध्ये शाहरुखसोबत सुहाना आणि आर्यन खेळताना दिसत आहेत. सुहानाच्या या फोटोवर इंडस्ट्रीतील अनेक कलाकारांनी कमेंट्स केले आहेत. आर्यनला जामीन मिळाल्यानंतर अनेक बॉलिवूड कलाकारांनी सोशल मीडियावरील पोस्टद्वारे प्रतिक्रिया दिल्या आहेत.

आर्यनसह त्याचा मित्र आणि प्रकरणातील सहआरोपी अरबाज मर्चंट आणि मुनमुन धमेचा यांनाही न्यायालयाने जामीन मंजूर केला. एनसीबीने आर्यनच्या जामिनाला केलेला विरोध खोडून काढणारा युक्तिवाद आर्यनच्या वतीने ज्येष्ठ विधिज्ञ मुकुल रोहतगी यांनी केला. दोन्ही बाजूंचे युक्तिवाद ऐकल्यानंतर न्यायमूर्ती नितीन सांब्रे यांनी आर्यन आणि अन्य दोन याचिकाकर्त्यांच्या याचिका मंजू केल्या. जामीन मंजूर का करण्यात आला, याचा तपशीलवार आदेश शुक्रवारी संध्याकाळपर्यंत देणार असल्याचंही न्यायालयाने स्पष्ट केलं.

गौरी खानची खास मैत्रीण महीप कपूरनेही सोशल मीडियावर आर्यन आणि गौरीचा फोटो पोस्ट केला होता. या फोटोमध्ये गौरी खान ही चिमुकल्या आर्यनला तिच्या मिठीत घेतल्याचं पहायला मिळत आहे. या फोटोला सुहानासह आलिया भट्ट, अनिल कपूर, करिश्मा कपूर आणि खुशी कपूर यांनी लाइक केलं. २५ दिवसांहून अधिक काळ कारागृहात असलेल्या आर्यनला जामीन मिळताच 'मन्नत' बंगल्याबाहेर चाहत्यांनी फटाके फोडत आनंद व्यक्त केला.