Actor Gayatri Joshi, Husband Back In Mumbai गेल्या काही दिवसांपासून अभिनेत्री गायत्री जोशी चर्चेत आली आहे. इटलीतील सार्डिनिया येथे झालेल्या रस्ते अपघातानंतर गायत्री आणि तिचा पती दोघांबद्दल अनेक वेगवेगळ्या चर्चा होऊ लागल्या होत्या.

इटलीतील सार्डिनिया येथे झालेल्या रस्ते अपघातानंतर दोन स्विस नागरिकांचा मृत्यू झाला. तर गायत्री जोशी आणि तिचा पती थोडक्यात वाचले होते. आता गायत्री आणि तिचा पती मायदेशी परतल्याचे वृत्त समोर आले आहे.

गायत्री जोशी आणि तिचा बिझनेसमन पती विकास ओबेरॉय शुक्रवारी मुंबईत परतले. समोर आलेल्या मीडिया रिपोर्टनुसार, सूत्रांचे म्हणणे आहे की, इटलीतील कार अपघातात ओबेरॉय रियल्टी चेअरमन आणि एमडी विकास ओबेरॉयच्या विरोधात प्रथमदर्शनी कोणतीही तक्रार दाखल केली गेलेली नाही.

सोमवारी झालेल्या या कार अपघातात अनेक कारपैकी एक कार विकास चालवत होता आणि त्याची चौकशी सुरू आहे. तर इटलीतील परराष्ट्र विभागाने एका तांत्रिक तज्ज्ञाची देखील नियुक्ती केली आहे. जो या अपघाताचे कारण शोधणार आहे.

तर ओबेरॉय रियल्टीने एका निवेदनात जारी करत म्हटले आहे की, "आमचे अध्यक्ष आणि व्यवस्थापकीय संचालक विकास ओबेरॉय आणि त्यांची पत्नी गायत्री ओबेरॉय यांचा 2 ऑक्टोबर 2023 रोजी सार्डिनिया, इटली येथे अपघात झाला. ते सुखरूप आहेत आणि आज ते मुंबईला परतले आहेत."

तर यापुर्वी डेली मेलने दिलेल्या वृत्तानुसार, सार्डिनिया येथील सरकारी वकिलांनी 'डबल रोड मर्डर' प्रकरणाची चौकशी सुरू केली आहे आणि जर या प्रकरणात विकास दोषी ठरला तर त्याला सात वर्षांपर्यंत जेल होईल.

शाहरुख खानसोबत स्वदेस हा चित्रपट केल्यानंतर एका वर्षानंतर गायत्री जोशीने बिझनेसमन विकास ओबेरॉयशी लग्न केले. त्यानंतर तिने इंडस्ट्रीला राम राम ठोकला. गायत्रीचा पती विकास ओबेरॉय मुंबईत रिअल इस्टेट फर्म चालवतात. या जोडप्याला दोन मुले आहेत. आता या प्रकणाचा तपास सुरु असून यात काय नवीन खुलासे होतात याकडे सर्वांचे लक्ष लागले आहे.