सध्या पौराणिक मालिकांचे सत्र जोरदार सुरू आहे. प्रत्येक वाहिनीवर किमान एक तरी पौराणिक चारित्रावर आधारित मालिका सुरू आहे. यामध्ये सर्वाधिक चर्चेत असलेली मालिका म्हणजे कलर्स मराठी वरील 'जय जय स्वामी समर्थ'.. या मालिकेतून अक्कलकोट निवासी श्री स्वामी समर्थ महाराजांची चरित्रगाथा सांगण्यात आली आहे. ही मालिका सध्या चाहत्यांच्या प्रचंड पसंतीस उतरली असून एक रंजक आणि महत्वाचा टप्पा जवळ आला आहे.

स्वामींच्या चारित्रातील एक महत्वाचा भाग म्हणजे 'सुंदराबाई काडगावकर'. सुंदरा बाईंनी बरीच वर्षे स्वामी सेवा केली. एक विधवा आणि गांजलेली श्री म्हणून स्वामींनी सुंदराबाईंना आधार दिला खरा परंतु त्याच सुंदराबाई नंतर अहंकार आणि लोभाच्या आहारी गेल्या. स्वामींच्या मठात लाच घेणे, पैसे लुटणे, चोरी करणे. भक्तांना त्रास देने असे अनेक उद्योग त्यांनी केले. आजवर आपण मालिकेतून ते पाहिलेच. पान स्वामी सुंदराबाईंना शिक्षा कधी करणार याकडे प्रेक्षकांचे लक्ष लागले होते. अखेर तो क्षण जवळ आला आहे.

सध्या मालिकेत दाखवले जात आहे की, सुंदरा बाईंची सर्व कारस्थानांना बाळप्पा स्वामी, भुजंग, चोळप्पा आणि सर्वच भक्त वैतागलेले आहेत. ही सर्व स्वामींना ठाऊक असतानाही स्वामी त्यांना का माफ करत आहेत, त्यांना शिक्षा का नाही असा प्रश्न सर्वांना पडला आहे. त्यावर स्वामी म्हणतातही की तिचं पूर्व कर्म चांगलं असल्याने दुर्लक्ष करावं लागतं. पण तिच्या पाप कर्मांचा घडा आता भरला आहे. तो घडा भरेल त्या दिवशी तिला शिक्षा होईल असे संकेत स्वामींनी दिले होते. आणि आता लवकरच सुंदराबाईंना स्वामींच्या क्रोधाला सामोरे जावे लागणार आहे.

नुकताच एक प्रोमो प्रदर्शित झाला आहे. ज्यामध्ये स्वामी म्हणतात, 'सुंदरे आम्हाला स्नान घाल.. तुला खूप सेवा करायची होती ना आमची आता कर..' पण सुंदरा बाईंच्या पायाला जखम झाल्याने त्या ते करू शकत नाहीत. त्यावर स्वामी म्हणतात, 'तू माझ्या भक्तांना दुखावलं आहेस ना.. आता तुला क्षमा नाही..' हा प्रोमो सध्या व्हायरल होत आहे. स्वामी सुंदराबाईंना काय शिक्षा देणार याकडे सर्वांचे लक्ष लागलेले आहे. लवकरच हा भाग प्रक्षेपित होईल.