Munmun Dutta: सध्या साऱ्या जगाचं लक्ष लागलं आहे ते इस्राइल आणि पॅलेस्टाईनमधील युद्धाकडे. शनिवारी सुरू झालेले दोन्ही देशांमधील युद्ध अजूनही सुरू असून तीव्र होत आहे. त्यातच आता या युद्धाबाबत नेटकऱ्यांनी सोशल मीडियावर अनेक प्रतिक्रिया दिल्या आहेत.

तर भारताने इस्राइलला पाठिंबा दिला आहे. मात्र या सर्वांत अभिनेत्री नुरसत भरुचाची जास्त चर्चा रंगली. दोन्ही देशांच्या या युद्धात नुसरत वाईटरित्या अडकली होती. अखेर भारतीय दुतावासाच्या मदतीने तिला भारतात सुखरूप आणण्यात आले आहे.

मात्र नुसरतच नाही तर आणखी एक अभिनेत्री इस्राइलला अडकली असती. पण तिचं दैव्य बलवत्तर म्हणुन ती थोडक्यात बचावली आहे. ती अभिनेत्री आहे 'तारक मेहता का उल्टा चष्मा' फेम बबिता म्हणजेच मुनमुन दत्ता.

आता मुनमुनने स्वतः सोशल मीडियाच्या माध्यमातून एक पोस्ट करत ती या युद्धात अडकण्यापासून कशी थोडक्यात बचावली या बाबात तिच्या चाहत्यांना सांगितले आहे.

मुनमुन तिच्या इंस्टाग्राम स्टोरीत लिहिते, "मी तुम्हाला खरं सांगत आहे, सध्या मी इस्रायलमध्ये अडकली असती. माझी तिकिटेही बुक झाली होती, पण मला ती तिकीट तारीख पुढच्या आठवड्यात करावी लागली.

'तारक मेहता'मुळे अचानक माझी नाईट शिफ्ट वाढवण्यात आली. सुरुवातीला मला खूप वाईट वाटले पण आता मला समजले की जे काही होते ते चांगल्यासाठीच होते. मी आज माझा जीव गमावू शकले असते.

या घटनेवरून हे स्पष्ट होते की देव निश्चितपणे अस्तित्वात आहे आणि जे काही घडतं चांगल्यासाठीच घडतं. मला आशा आहे की इस्रायलमध्ये शांतता व्हावी. जगभर शांतता नांदावी."

'तारक मेहता का उल्टा चष्मा' हा लोकांचा आवडता शो आहे. या शोमधील मुनमुन दत्ताही भुमिका सर्वांना खुप आवडते. ती सोशल मीडियावर खूप सक्रिय असते आणि तिच्या आयुष्याशी संबंधित प्रत्येक अपडेट शेअर करत असते.