'तारक मेहता का उल्टा चष्मा' ही छोट्या पडद्यावरील सर्वांत लोकप्रिय मालिका आहे. या मालिकेने नुकतेच ३१०० एपिसोड्स पूर्ण केले. गेल्या १३ वर्षांपासून ही मालिका प्रेक्षकांचं मनोरंजन करतेय. जेठालाल, दयाबेन, माधवी भिडे, भिडे मास्तर, तारक मेहता यांसारख्या मालिकेतील प्रत्येक भूमिकेने प्रेक्षकांची मनं जिंकली आहेत. मालिकेच्या कथानकासोबतच त्यातील पात्रांनी आपल्या अभिनयाने प्रेक्षकांच्या चेहऱ्यावर हसू आणलं आहे. मालिकेत विविध भूमिका साकारणारे हे कलाकार खऱ्या आयुष्यात कसे आहेत, त्यांना मानधन किती मिळतं, सर्वाधिक मानधन कोणत्या कलाकाराला मिळतं, याविषयी जाणून घेण्यासाठी चाहते नेहमीच उत्सुक असतात. तर या कलाकारांच्या मानधनाविषयी जाणून घेऊयात..

'इंडिया डॉटकॉम'ने दिलेल्या माहितीनुसार, मालिकेत जेठालालची भूमिका साकारणाऱ्या अभिनेते दिलीप जोशी यांना सर्वाधिक मानधन मिळतं. दिलीप यांना एका एपिसोडसाठी दीड लाख रुपये मिळतात. जुलै २००८ पासून या मालिकेत अभिनेते शैलेश लोढा हे तारक मेहताची भूमिका साकारत आहेत. त्यांना एका एपिसोडसाठी एक लाख रुपये मानधन मिळतं. या मालिकेत सर्वांत चर्चेत असलेली भूमिका म्हणजे भिडे मास्तर. भिडे मास्तरांची भूमिका साकारणाऱ्या मंदार चांदवडकरला एका एपिसोडसाठी ८० हजार रुपये मिळतात.

हेही वाचा : गौतमी देशपांडे अपघातातून थोडक्यात बचावली; पोस्ट केला व्हिडीओ

मालिकेतील जेठालाल आणि बबिता यांच्यातील केमिस्ट्रीला प्रेक्षकांकडून विशेष पसंती मिळते. बबिताची भूमिका साकारणाऱ्या मुनमुन दत्ताला प्रत्येक एपिसोडसाठी ३५ हजार ते ५० हजार रुपये मिळतात. तर जेठालालचे वडील चंपकलाल यांची भूमिका साकारणाऱ्या अमित भट्ट यांना ७० ते ८० हजार रुपये मानधन मिळतं.