मुंबई - बॉलीवूडचा मिस्टर परफेक्शनिस्ट आमिर खान अभिनित आणि दिग्दर्शित असलेला तारे जमीन पर हा चित्रपट प्रेक्षकांना प्रचंड भावला होता. त्यामध्ये त्यानं केलेल्या निकुंभ सरांची भूमिका लोकप्रिय झाली होती. त्याही पेक्षा प्रेक्षकांच्या लक्षात राहिला होता तो ईशान अवस्थी. डिस्लेकसिया आजारानं त्रस्त असणाऱ्या ईशानला मोठ्या कल्पकतेनं जगातील स्पर्धेसाठी तयार करणाऱ्या निकुंभ सरांची गोष्ट प्रेक्षकांना आवडली. त्यांनी तिचं मनापासून स्वागतही केलं. ईशानच्या भूमिकेला दाद दिली. आता ईशान अवस्थीचा एक आगळा वेगळा लूक व्हायरल झाला आहे.

ईशानचा मॅचो लूक तुम्ही पाहिला तर कदाचित तुम्हाला विश्वास बसणार नाही की हा ईशानच आहे ते. ईशानची भूमिका करणारा दर्शील आता 24 वर्षांचा झाला आहे. त्याचा आगळा वेगळा लूक असलेला फोटो सोशल मीडियावर व्हायरल झाला आहे. त्याच्या चाहत्यांनी त्या फोटोला वेगवेगळ्या प्रकारच्या कमेंट दिल्या आहेत. हा तोच ईशान आहे का ज्याला लिहिण्या वाचण्याची समस्या होती. ज्यानं तारे जमीन पर मध्ये प्रभावी भूमिका साकारुन प्रेक्षकांचं लक्ष वेधून घेतलं होतं. चाहत्यांनी त्याच्या या नव्या लूकचं स्वागत करुन त्याला शुभेच्छा दिल्या आहेत.

तारे जमीन पर जेव्हा प्रदर्शित होणार होता त्यावरुन सुरुवातीला त्याच्यावरुन मोठा वाद निर्माण झाला होता. त्याचे दिग्दर्शन अमोल गुप्ते यांनी केले होते. मात्र अचानक त्याचे दिग्दर्शन आपण केल्याचा दावा आमिरनं केला आणि त्यावरुन वादाला सुरुवात झाली होती. त्यावेळी अमोल गुप्ते यांनी पत्रकार परिषदेतून या प्रकरणाचा खुलासा केला होता. बाकी काही का असेना हा चित्रपट प्रेक्षकांमध्ये प्रचंड लोकप्रिय झाला होता. ईशानच्या भूमिकेत असणाऱ्या दर्शिलनं सर्वांची मनं जिंकून घेतली होती. तु अजूनही तितकाच जिनिअस आहे जेवढा तारे जमीन पर मध्ये होतास....अशी प्रतिक्रिया एका चाहत्यानं दर्शिलला दिली आहे.