मुंबई- गेल्या आठवड्यात नवीन भागांसह धडाक्यात एंट्री केल्यानंतर सोनी एन्टरटेन्मेंट टेलिव्हिजनवरील लोकप्रिय शो 'इंडियाज बेस्ट डान्सर' आता येत्या भागात बॉलीवूडच्या महान कलाकारांना आदारांजली वाहण्यासाठी सज्ज आहे. प्रेक्षकांना सर्वोत्तम 12 स्पर्धक व त्यांचे कोरिओग्राफर यांचे उत्कृष्ट परफॉर्मन्सेस पाहायला मिळतील. त्यांचे परीक्षण करतील टेरेन्स लुईस, गीता कपूर आणि मलाइका अरोरा. अमिताभ बच्चनपासून महमूद तसेच श्रीदेवी, राज कपूर, राजेश खन्ना आणि ऋषी कपूर व इतर अनेक कलाकारांना हे स्पर्धक आपल्या खास डान्स शैलीत आदरांजली अर्पण करतील.

हे ही वाचा: गायक अभिजीत भट्टचार्य यांच्या मुलाला कोरोनाची लागण, आता अभिजीत यांचा समोर आला रिपोर्ट

पुण्याहून आलेली स्पर्धक ऋतुजा जुन्नरकर ही ‘मास्टरजी’ सरोज खानने कोरिओग्राफ केलेल्या नृत्यांवर थिरकताना दिसेल. ऋतुजा आणि गुरु आशीष पाटील या दोघांनी बॉलीवूड डान्स गुरुने कोरिओग्राफ केलेल्या गीतांच्या मेलोडीवर परफॉर्म केले. त्या महान कोरिओग्राफरला वाहिलेली ही एक उत्कृष्ट श्रद्धांजली होती. तिन्ही परीक्षकांनी त्यांच्या ऍक्टचे तोंड भरून कौतुक केले आणि पहिल्यांदाच या शोमध्ये त्यांना स्टँडिंग ओव्हेशन मिळाले. 

टेरेन्स म्हणाला, “सरोजजींसोबत काम करण्याचे भाग्य मला लाभले आहे. त्यांची शिकवण्याची शैली अगदी वेगळीच होती. त्या अत्यंत शिस्तप्रिय होत्या पण त्यातूनच आम्ही खूप काही शिकलो. केवळ त्यांना पाहूनच मी काही अनमोल धडे घेतले आहेत. ऋतुजा, तुझ्या परफॉर्मन्सबद्दल सांगायचे तर, जर सरोज जींनी तुझा परफॉर्मन्स पाहिला असता, तर त्यांनी तुझ्यासाठी नक्की काही तरी केले असते- नृत्याचे कौतुक करण्याची ती त्यांची पद्धत होती, आणि आज मी तेच करणार आहे.”

टेरेन्स मंचावर गेला आणि त्याने ऋतुजाला कौतुकाचे प्रतीक म्हणून 101 रु. दिले. चांगल्या नृत्याबद्दल डान्सरला कौतुक म्हणून पैसे देण्याची ही पद्धत सरोज खान त्यांच्या गुरूंकडून शिकल्या होत्या. हा मान मिळवल्यावर कोरिओग्राफर आशीष म्हणाला, “सरोज मॅम सोबत काम करण्याची संधी मला कधीच मिळाली नाही. पण त्या माझ्यासाठी गुरु द्रोणाचार्य आणि मी एकलव्य होतो. केवळ त्यांचे निरीक्षण करून मी खूप काही शिकलो आहे.”

Terrence brings back memories of late choreographer Saroj Khan