The Great Indian Family: बॉलिवूड अभिनेता विकी कौशल आणि सारा अली खान यांचा 'जरा हटके जरा बचके' हा सिनेमा यावर्षी रिलिज झाला ज्याला प्रेक्षकांनी खुप चांगला प्रतिसाद दिला. या सिनेमाने बॉक्स ऑफिसवर चांगली कमाई केली. प्रेक्षकांनी सारा आणि विकीच्या जोडीला डोक्यावर घेतलं. आता विकी कौशल पुन्हा एक धमाका करण्यासाठी सज्ज आहे.

'जरा हटके जरा बचके' नंतर आता विकी कौशलचा 'द ग्रेट इंडियन फॅमिली' हा सिनेमा प्रेक्षकांना लोटपोट करण्यासाठी येत आहे. विजय कृष्ण आचार्य दिग्दर्शित हा चित्रपट 22 सप्टेंबर 2023 रोजी थिएटरमध्ये प्रदर्शित होईल.

यशराज फिल्म्सच्या बॅनरखाली बनलेल्या या चित्रपटात विकी कौशल आणि मानुषी छिल्लर यांची नवी जोडी प्रेक्षकांच्या भेटीला येणार आहे. निर्मात्यांनी चित्रपटाच्या रिलीज डेटसोबतच एक मजेदार व्हिडिओ देखील शेयर केला आहे.

शाहरुख खान आणि दीपिका पदुकोण स्टारर 'पठाण' नंतर YRF आता 'द ग्रेट इंडियन फॅमिली' या चित्रपट प्रेक्षकांसाठी घेऊन येत आहे. आता या चित्रपटाचा व्हिडिओ शेयर करत निर्मात्यांनी या सिनेमाचा ट्रेलर बुधवारी प्रेक्षकांच्या भेटीला असल्याचे सांगितले आहे.

YRF ने आपल्या अधिकृत इंस्टाग्रामवर चित्रपटाचा प्रोमो शेअर केला आहे. त्यात लिहिलं की, 'दिल थाम के हो जाओ तयार...मारे एंट्री- भजन कुमार. रिमाइंडर सेट करा उद्या येतोय.'

विकी कौशल आणि मानुषी छिल्लरसोबत या चित्रपटात मनोज पाहवा, कुमुद मिश्रा, सादिया सिद्दीकी, अलका अमीन आणि सृष्टी दीक्षित यांच्याही महत्वाच्या भुमिका आहेत.

विकी कौशल हा नेहमीच वेगळ्या धाटणीचे चित्रपट करण्यासाठी ओळखला जातो. त्याने अनेक सिनेमांतुन प्रेक्षकांचे मनोरंजन केले आहे. ज्यात उरी, मसान, राझी, संजू, सरदार उधम, मनमर्जियां, जरा हटके जरा बचके यांसारख्या चित्रपटांचा सामावेश आहे. आता त्याच्या द ग्रेट इंडियन फैमिली या चित्रपटाची चाहत्यांमध्ये चर्चा आहे.