मुंबई - बॉलिवूड अभिनेत्री अनुष्का शर्मा आणि भारतीय क्रिकेट संघाचा कर्णधार विराट कोहली यांना 11 जानेवारी रोजी कन्यारत्न झाले. विराट आणि अनुष्काने ही गुड न्यूज सोशल मीडियाच्या माध्यमातून चाहत्यांना दिली होती. अनुष्का आणि विराटने त्यांच्या मुलीचे नाव वामिका ठेवले आहे. दरम्यान, अनुष्का आणि विराट यांचा लेकीसोबतचा फोटोही सोशल मीडियावर व्हायरल झाला होता. त्यात विराट आणि अनुष्का दोघे बाळाकडे पाहात असल्याचं दिसतं. तसंच त्यानंतर अनुष्कानेसुद्धा एक फोटो सोशल मीडियावर शेअर केला होता. ज्यामध्ये तिच्या खांद्यावर बाळाचे कपडे आहेत. या फोटोला अनुष्काने 'माझी सध्याची सर्वात आवडती एक्सरसाइज' असं कॅप्शन दिले.

महिला दिनाचे औचित्य साधून विराट आणि अनुष्का यांनी सोशल मीडियावर एक फोटो शेअर केला आहे. यामध्ये अनुष्का आणि वामिका दिसत आहेत. मायलेकींचा फोटो शेअर करताना विराटने महिला दिनानिमित्त खास मेसेजही दिला आहे. 

'माणसाच्या आयुष्यात जन्म दिलेल्या बाळाला पाहणे हा अविश्वसनिय, आश्चर्यजनक आणि सुंदर अनुभव आहे. या अनुभवाचा साक्षीदार झाल्यानंतर महिलांचं खरं सामर्थ्य, देवत्व समजलं आणि देवाने त्यांच्यामध्ये जीव का निर्माण केला तेसुद्धा समजलं. माझ्या आयुष्यातील कणखर आणि माझा जीव असलेल्या आणि जगातील सर्व महिलांना महिला दिनाच्या शुभेच्छा' असं कॅप्शन विराटने या फोटोला दिले आहे. 

मनोरंजन क्षेत्रातील इतर बातम्या वाचण्यासाठी क्लिक करा

अनुष्का आणि विराटच्या चाहत्यांनी या फोटोला लाइक करून कमेंन्टमध्ये अनुष्का आणि वामिकाला महिला दिनाच्या शुभेच्छा दिल्या. वामिकाचा जन्म झाल्यावर विराट आणि अनुष्काने वामिकाला मिडीयापासून दूर ठेवण्याचा निर्णय घेतला होता. त्यामुळे तिचा चेहरा दिसू न देता विराट आणि अनुष्का वामिकाचे फोटो सोशल मीडियावर शेअर करत आहेत.