हिंगोली : येथील रामलीला मैदानावर असलेल्या दसरा समितीच्या कार्यालयाला गुरुवारी सायंकाळी पाचच्या सुमारास अचानक आग लागली. आगीचे वृत्त कळताच नगरपरिषदेचे मुख्याधिकारी अरविंद मुंढे यांनी अग्निशमन विभागाला घटनास्थळी पाठवले. त्यानंतर आग आटोक्यात आली. मात्र, आगीचे कारण स्पष्ट होऊ शकले नाही.

येथील रामलीला मैदानावर दसरा समितीचे कार्यालय आहे. कार्यालयाच्या आत समितीचे विविध साहित्य यासह दसरा महोत्सवात वापरण्यात आलेले पुतळे ठेवण्यात आलेले होते. गुरुवारी सायंकाळी पाचच्या सुमारास कार्यालयातून धुराचे लोट उठू लागले.

आग लागल्याचे समजताच नागरिकांनी आग आटोक्यात आणण्यासाठी पळापळ केली. दरम्यान, नगर परिषदेच्या अग्निशमन दलाला मुख्याधिकारी श्री. मुंढे यांनी घटनास्थळी बंब घेऊन पाठविले. त्यानंतर अग्निशमन दलाचे प्रमुख बाळू बांगर, दिलीप दोडके, अफसर खा पठाण घटनास्थळी स्थळी बंब घेऊन दाखल झाले. त्यांनी आग आटोक्यात आणली. घटनेची माहिती मिळताच पोलिस अधिकारी व प्रशासनाच्या अधिकाऱ्यांनी घटनास्थळी भेट देऊन पाहणी केली. यामध्ये साहित्य जळून नुकसान झाले आहे. दरम्यान, ही आग शॉर्ट सर्किटने लागली असावी असा अंदाज व्यक्त केला जात आहे.