भूम /उस्मानाबाद : पिस्तूल हाताळताना चुकून ट्रिगर दबल्याने एकाचा जागीच मृत्यू झाला. ही घटना पाटसांगवी (ता. भूम) येथे शनिवारी (ता. २९) दुपारी तीन ते चारच्या सुमारास घडली. घटनेनंतर पिस्तूल परवानाधारक युवकाने वालवड येथील पोलिस दूरक्षेत्रात हजर होत घडलेला प्रकार सांगितला. गंभीर जखमी युवकाला उपचारासाठी बार्शी येथे हलविण्यात आले होते; मात्र डॉक्टरांनी त्यास मृत घोषित केले. 

पोलिसांनी दिलेल्या माहितीनुसार, दस्तगीर जिलानी पटेल (वय ४०, रा. पाटसांगवी) असे मृताचे नाव आहे. मृत दस्तगीर पटेल हा मित्र बाबा पटेल (रा. पाटसांगवी, ह. मु. पुणे) याच्यासमवेत जेवणासाठी गेला होता. यावेळी त्यांनी मद्यप्राशन केले होते. दरम्यान, बाबा पटेल याच्याकडे असलेली पिस्तूल दस्तगीर हाताळत असताना चुकून ट्रिगर दबल्याने गोळी लागून तो गंभीर जखमी झाला.

रक्ताच्या थारोळ्यात पडलेल्या दस्तगीरला उपचारासाठी तत्काळ बार्शी येथे हलविण्यात आले; मात्र डॉक्टरांनी त्यास मृत घोषित केले. माहिती मिळताच भूमचे पोलिस निरीक्षक रामेश्वर खनाळ, सहायक पोलिस निरीक्षक मंगेश साळवे घटनास्थळी दाखल झाले. याप्रकरणी गुन्हा नोंद करण्याची प्रक्रिया रात्री उशिरापर्यंत सुरू होती. 

हेही वाचा - आमदारांच्या सासऱ्याचे उपोषण अन तलाठ्यांचे निलंबन....काय आहे प्रकरण?

दरम्यान, मद्यधुंद अवस्थेतील दस्तगीरने पिस्तूल बघण्याची इच्छा व्यक्त केली. यावेळी पिस्तूल हाताळत असताना चुकून ट्रिगर दबल्याने गोळी लागून त्याचा मृत्यू झाल्याची प्राथमिक माहिती मिळाल्याचे अपर पोलिस अधीक्षक संदीप पालवे यांनी सांगितले. हा प्रकार घडल्यानंतर ज्याच्या मालकीचे पिस्तूल आहे, त्याने तत्काळ वालवड येथील पोलिस दूरक्षेत्र गाठून घडलेला प्रकार सांगितला. त्यास ताब्यात घेत चौकशी सुरू केली असल्याचेही श्री. पालवे यांनी सांगितले.

हेही वाचा - शेतकरी म्हणतो, साहेब मी जिवंत....अधिकारी म्हणतात मेला

या घटनेने गावामध्ये एकच खळबळ उडाली असून, चर्चेला उधाण आले आहे. भूम पोलिस ठाण्याचे पथक तातडीने बार्शीकडे रवाना झाले आहे. नातेवाइकांकडून अधिक माहिती घेतली जाणार असून, नेमकी माहिती समोर आल्याशिवाय याप्रकरणी काहीही सांगता येणार नसल्याचे पोलिसांनी सांगितले.