नांदेड : महावितरण कंपनीकडून विज चोरीवर आळा घालून विज बील वसुलसाठी विशेष मोहीम राबविण्यात येत आहे. या दरम्यान उस्माननगरच्या पथकाने शिराढोण येथे कारवाई करून १५ आकोडेबहाद्दरांवर कारवाई केली. त्यांच्याविरुध्द लोहा पोलिस ठाण्यात गुन्हा दाखल करण्यात आला. 

महावितरणकडून विजचोरीवर आळा बसावा यासाठी सतत कारवाईचे सत्र सुरू केले आहे. अनेक थकबाकीदार विज ग्राहक विजबिल भरत नाहीत. त्यामुळे महावितरणचा महसुल बुडत आहे. नियमीत विजबिल भरणाऱ्या ग्राहकांना महावितरणची सेवा सुरळीत मिळावी म्हणून थकबाकीदाराविरुध्द कारवाईचे सत्र सुरू केले आहे. महावितरणच्या उस्माननगर उपविभागाचे सहाय्यक अभियंता तुषार वाघमारे यांनी आपल्या पथकाला सतर्क केले. या पथकांनी शिराढोण (ता. कंधार) येथे कारवाई केली. यावेळी गावात शिरताच विज पुरवठा करणाऱ्या तारावंर आकोड्याचे जाळे दिसून आले. या पथकांनी सर्व आकोडे सर्व प्रथम जप्त केले. 

हेही वाचा --‘या’ किल्ल्याच्या सौंदर्यासाठी पाच कोटी खर्च

विजेच्या खांबावर आकोड्याचे जाळे

यावेळी तारावरील टाकलेले आकोडे सर्वीस वायर जप्त करून ज्यांनी- ज्यांनी विज चोरी केली त्यांच्याविरुध्द लोहा पोलिस ठाण्यात सोमवारी (ता. २३) १५ जणांवर गुन्हा दाखल केला.  कारवाई ता. दोन नोव्हेंबर रोजी केली होती. ६४ हजार ८५४ रुपयाची विज चोरी झाल्याचे उघड झाले. यावेळी तडजोडअंती ४१ हजार रुपये देण्याचे ठरले. यातून जवळपास सहा हजार ८३३ युनीटची चोरी झाली होती.  या प्रकरणी सहाय्यक अभियंता तुषार वाघमारे यांच्या फिर्यादीवरून कृष्णा सोळंके, सदानंद भूरे, काशिराम बिचेवार, दिगांबर कपाळे, इसाक शेख, रामदास जाधव, भगवान कळसे, दस्तगीर अल्लाबक्ष लालकुंभार, शिवाजी राठोड, रेणूका राठोड, भोजू जाधव, विश्‍वनाथ कपाळे, दशरथ गायकवाड, मुजीब लालकुंभार, चंद्रकंत नांदेडे यांच्याविरुध्द गुन्हा दाखल केला. तपास पोलिस निरीक्षक बालाजी मोहिते करीत आहेत.

येथे क्लीक करा--शिक्षेचे प्रमाण वाढविण्याचा प्रयत्न

महावितरणचे आवाहन

जिल्ह्यातील सर्वच स्तरातील विज ग्राहक थकबाकीदार यांनी आपल्याकडील थकबाकी भरावे असे आवाहन महावितरणच्या वतीने करण्यात आले आहे. जिल्ह्यात मोठ्या संख्येने विज ग्राहकांकडे थकबाकी आहे. त्यांनी जर थकबाकी वेळेत भरली तर विजपुरवठा सुरळीत ठेवता येते. थकबाकीदारांमुळे नियमीत वीज बिल भरणाऱ्या विज ग्राहकांना त्रास सहन करावा लागतो. त्यामुळे विज पुरवठा खंडीत करण्याची कारवाई सुरू आहे. थकबाकीदारांनी आपल्याकडील थकबाकी भरून महावितरणला सहकार्य करा असे आवाहन केले. 
संतोष वहाने, अधिक्षक अभियंता, महावितरण, नांदेड.