आखाडा बाळापूर ः कळमनुरी तालुक्‍यातील आखाडा बाळापूर येथील ग्रामपंचायतीमध्ये प्रभागाच्या आरक्षणासंदर्भात सोमवारी (ता. तीन) विशेष सभा आयोजित करण्यात आली होती. या सभेत चुकीचे आरक्षण होत असल्याच्या आरोपावरून एकच गोंधळ झाल्याने नागरिक बैठकीतून निघून गेले.

बाळापूर येथील ग्रामपंचायतीमध्ये सोमवारी सकाळी ११ वाजता प्रभागांच्या आरक्षणाबाबत विशेष सभेस मंडळ अधिकारी ए. एम. सुळे, तलाठी राजू क्षीरसागर, ग्रामविकास अधिकारी राजेश घुगे, सरपंच जिया कुरेशी, उपसरपंच विजय बोंढारे यांची उपस्थिती होती. या वेळी प्रभागांचे आरक्षण सोडताना वादळी चर्चा झाली. 

हेही वाचा - सभापतिपदाच्या खाते वाटपावरून राजकीय कुरघोडी

नागरिकांचा प्रभाग आरक्षण सोडतीबाबत आरोप 
या वेळी नागरिकांनी प्रभाग आरक्षण सोडत चुकीच्या पद्धतीने होत असल्याचा आरोप करीत विशेष सभेमध्ये एकच गोंधळ सुरू झाल्यामुळे ग्रामपंचायतीमधून नागरिक निघून गेले. ही सभा रद्द करून पुन्हा बोलवा, असे नागरिक सांगत होते. या वेळी उपस्‍थित अधिकाऱ्यांनी विशेष सभा रद्द करता येत नसल्याचे सांगितले. त्‍यामुळे पुन्हा गोंधळ सुरू झाल्यामुळे ही सभा रद्द झाल्याचे सांगण्यात आले. 

हेही वाचा -  गाय-वासरासाठी पाणी शेंदायला गेली अन् विहिरीत पडली

गोंधळ झाल्याने अधिकारी उठून गेले
या वेळी सोपान पाटील बोंढारे, दत्ता बोंढारे पाटील, संजय इंगळे, आहजर पठाण, शहाबाज कुरेशी, गोपाल बोंढारे, ठाकूरसिंग बावरी, सुभाष ठमके, संभाजी कुंभकरण, प्रल्हाद बोंढारे यशवंत पंडित, तय्यब पठाण, प्रमोद बोंढारे, संदीप बोंढारे, अरुण सूर्यवंशी आदींची उपस्‍थिती होती. दरम्‍यान, येथील प्रभाग आरक्षण सोडण्यात आल्याची माहिती मंडळ अधिकारी श्री. सुळे, ग्रामविकास अधिकारी राजू घुगे यांनी दिली. सतरा सदस्य असलेली व सहा प्रभागांचे आरक्षण सोडण्यात आले आहे. विशेष सभेमध्ये गोंधळ झाल्याने अधिकारी उठून गेले. प्रभागाची आरक्षण हे ढाब्यावर बसून सोडल्याचा आरोप नागरिक करीत आहेत.

कुरुंदा ग्रामपंचायतीच्या प्रभागांचे आरक्षण जाहीर
कुरुंदा ः वसमत तालुक्यातील कुरुंदा येथील ग्रामपंचायतीची मुदत जुलैमध्ये संपत असून या ग्रामपंचायत निवडणुकीच्या अनुशंगाने रविवारी (ता. दोन) प्रभागांचे आरक्षण जाहीर करण्यात आले आहे. कुरुंदा ग्रामपंचायत १७ सदस्यांची असून एकूण सहा प्रभाग आहेत. तालुक्याच्या राजकारणात अत्यंत महत्त्वाची ग्रामपंचायत म्हणून कुरुंदा ओळखली जाते. येथील अनेक मातब्बर उमेदवारांचे लक्ष या आरक्षण सोडतीकडे लागले होते. राजकीय केंद्रस्थान म्हणून गावाची ओळख आहे, त्यामुळे गावातील राजकीय घडामोडींकडे तालुक्याचे लक्ष लागलेले असते. रविवारी ग्रामपंचायतीचे प्रभागनिहाय आरक्षण जाहीर झाले. 

असे आहे कुरुंदा येथील आरक्षण 
प्रभाग एकमध्ये तीन जागांसाठी ओपन महिला एक, ओपन पुरुष एक, अनुसूचित जाती महिला एक, प्रभाग दोनमध्ये ओपन महिला एक, ओपन पुरुष एक, ओबीसी महिला एक, प्रभाग तीनमध्ये ओपन महिला एक, ओबीसी पुरुष एक, प्रभाग चारमध्ये ओबीसी महिला एक, ओपन पुरुष एक, ओपन महिला एक, प्रभाग पाचमध्ये ओबीसी पुरुष एक, ओपन महिला एक, ओपन पुरुष एक, तर प्रभाग सहामध्ये अनुसूचित पुरषासाठी एक, ओपन पुरुष एक, ओबीसी महिला एक, अशा जागा आरक्षित आहेत. काही प्रभागनिहाय मतदारसंघामध्ये फेरबदल झाल्याचे दिसून आले आहे.

यांची होती प्रमुख उपस्थिती
या बाबत ग्रामपंचायत कार्यालयात नायब तहसीलदार सचिन जयस्वाल यांच्या अध्यक्षतेखाली विशेष सभेचे आयोजन करण्यात आले होते. या वेळी ग्रामविकास अधिकारी टी. एल. कोकरे, मंडळ अधिकारी श्री. आंभोरे, बाजार समतीचे सभापती राजेश इंगोले पाटील, पंचायत समितीचे माजी सभापती चंद्रकांत दळवी पाटील, माजी सरपंच दत्तरामजी इंगोले पाटील, माजी शिक्षण सभापती रंगराव कदम, विश्वनाथराव दळवी, अशोकराव दळवी, मुंजाजी दळवी, गणपत सिद्धेवार, अशोक सोनटक्के, गणपत काळे, लतिफ कुरेशी, नारायण ओसरमल्ले, एहसान जहागीरदार आदींची उपस्‍थिती होती.