कुंभार पिंपळगाव (जि.जालना) : श्रावणात घन निळा बरसला.... दिवसभराच्या कडक उन्हानंतर कुंभार पिंपळगावसह (Jalna) परिसरात रविवारी (ता.१५) सायंकाळी श्रावण सरी (Rain) बरसल्या. त्यामुळे शेतकरी समाधान व्यक्त करित आहेत. गेल्या पंधरा ते वीस दिवसांपासून पावसाने खंड दिला होता. यामुळे खरिपातील पिकांची (Kharip Crops) वाढ खुंटली होती, तर हलक्या जमिनीतील पिके माना टाकून सुकुन गेले होते. यामुळे शेतकऱ्यांच्या तोंडचे पाणी पळाले होते. शेतीतील आंतरमशागतीची कामे पूर्ण करून शेतकऱ्यांचे डोळे आभाळाकडे लागले होते. पाऊस नसल्याने तो चिंतेत होता. गेल्या आठ दिवसांपासून उन्हाची तीव्रता वाढली होती. अंगाची लाही-लाही होत होती.

यामुळे पावसाळ्यात उन्हाळा झाल्यासारखे वाटत होते. रविवारी सायंकाळी पाऊस सुरू झाल्याने शेतकऱ्यांना काहीसा दिलासा मिळाला आहे. सोयाबीन, कापूस, तूर, उडीद, बाजरी आणि मूग या पिकांसाठी हा पाऊस उपयुक्त ठरणार आहे.