हिंगोली : जिल्ह्यात तब्बल दीड महिन्यानंतर गुरुवारी (ता. १४) दारू दुकाने उघडल्याने तळीरामांनी दारू खरेदीसाठी शहरातील रामलीला मैदानालगत असलेल्या वाईन शॉपवर एकच गर्दी केली. मात्र, परवानाधारक असेल तरच मद्य देणार असल्याचे विक्रेत्यांनी सांगितल्याने बहुतांश मद्यपींना आल्या पावली माघारी फिरण्याची वेळ आली.

कोरोनाच्या पार्श्वभूमीवर करण्यात आलेल्या लॉकडाउननंतर हिंगोलीत तब्बल दीड महिन्यानंतर पहिल्यांदाच मद्य विक्रीची दुकाने दिवसाआड उघडण्याचे आदेश जिल्हाधिकारी रुचेश जयवंशी यांनी दिले आहेत. त्यानुसार गुरुवारी दुकाने उघडल्याने तळीरामांनी दारू खरेदी करण्यासाठी सकाळच्या सुमारास गर्दी केली. 

हेही वाचा - जाणकार म्हणतात, लघू उद्योगांना मिळणार चालना

पोलिसांनी गर्दी आटोक्यात आणली

झालेल्या गर्दीचे फोटो व्हॉट्सॲपवर व्हायरल होताच पोलिसांनी धाव घेतली. यावेळी काही वेळ तळीरामांनी गोंधळ घातला. त्यामुळे पोलिसांनी गर्दी आटोक्यात आणली. शहरात दोन होलसेल वाईन शॉप असून केवळ एकच दुकान सुरू होते. प्रत्येक ग्राहक जमेल तेवढी जास्त मद्य नेण्याचा प्रयत्न केला. 

बॅरिकेट्सही बसविण्यात आले

दरम्यान, कोरोनाच्या पार्श्वभूमीवर नियमांचे पालन करीत दुकानात काम करण्यासाठी निरोगी मजुरांची निवड करण्यात आली होती. त्यांच्या हातात हँडग्लोज पाहावयास मिळाले. तसेच दुकानाच्या बाहेर सहा फूट अंतराचे गोल रिंगण आखण्यात आले होते. तसेच बॅरिकेट्सही बसविण्यात आले होते. गुरुवारी व शनिवारी दारू विक्रीला परवानगी दिली असून त्यानंतर पुन्हा जिल्हा प्रशासनाकडून नवीन आदेश काढले जाणार आहेत.

कळमनुरी, वसमत, बाळापुरात गर्दी

कळमनुरी : शहरातील मद्य विक्रीची दुकाने गुरुवारी (ता. १४) तब्बल दीड महिन्यानंतर उघडण्यात आली. या वेळी पोलिस बंदोबस्तात दारू विक्री करण्यात आली. ग्राहकांसाठी सॅनिटायझरची व्यवस्था करून इलेक्ट्रॉनिक थर्मामीटरद्वारे तपासणी केली जात होती. 

येथे क्लिक करा - कोरोनाच्या संकटातही शोधली रोजगाराची संधी

परवाना देण्याची व्यवस्था

देशी दारूच्या दुकानांवरून ग्राहकांना एका पेक्षा अधिक बॉटल घेण्याकरिता तत्काळ एक दिवसाचा मद्य पिणे अथवा बाळगण्याचा परवाना देण्याची व्यवस्थाही करण्यात आली होती. त्यामुळे अनेकांनी तत्काळ परवाना फीस भरून अधिकच्या मद्य बॉटल खरेदी करण्याला पसंती दिली. 

सकाळपासून मद्यपी रांगेत

दरम्यान, वसमत शहरातील मामा चौक परिसर व झेंडा चौक परिसरातील एक, अशा दोन दुकानांवरून मद्य विक्री सुरू होती. यासाठी सकाळपासून मद्यपी रांगेत उभे होते. आखाडा बाळापुरातही दारू खरेदीसाठी ग्राहकांनी गर्दी केली होती. मात्र, औंढा नागनाथ शहरात मात्र मद्यपींनी दारू खरेदीकडे पाठ फिरविल्याचे चित्र पाहावयास मिळाले.