नांदेड : येत्या पौष पौर्णिमेस ता. १० व ११ जानेवारी रोजी प. पू. भदंत धम्मसेवक महाथेरो यांच्या अध्यक्षतेखाली महाविहार बावरीनगर, दाभड (नांदेड) येथे संपन्न होणाऱ्या ३३ व्या अखिल भारतीय बौद्ध धम्म परिषदेची तयारी अंतिम टप्प्यात आली आहे. रविवार (ता. पाच) जानेवारीस सभामंडपाच्या भूमिपूजनाचा कार्यक्रम जिल्हा परिषदेच्या अध्यक्षा शांताबाई जवळ्गावकर यांच्या हस्ते पार पडला. 

बौद्ध धम्म परिषदेच्या यशस्वी आयोजनासाठी सोमवार (ता. सहा) जानेवारीला जिल्हाधिकारी अरुण डोंगरे यांनी जिल्हाधिकारी कार्यालयात सर्व विभाग प्रमुखांची बैठक घेऊन होणा-या कामांचा आढावा घेतला. अतिशय शिस्तबद्ध पद्धतीने पार पडणा-या या परिषदेत दरवर्षी तीन ते चार लाख श्रद्धावान उपासक- उपासिका उपस्थित राहत असतात. या सर्व उपासकांची कुठल्याही प्रकारची गैरसोय हौऊ नये, याकरीता जिल्हा प्रशासन आवश्यक ती खबरदारी घेत आहे. 

हेही वाचा - तंत्रज्ञानाचा उपयोग गरीब रुग्णांसाठी व्हावा - पद्मश्री डॉ. लहाने

विदेशातील भन्तेंची उपस्थिती   

धम्म परिषदांची जन्मभूमी म्हणून मान्यता पावलेल्या महाविहार बावरीनगर येथे होणा-या ३३ व्या अखिल भारतीय बौद्ध धम्म परिषदेला देशातीलच नव्हे तर श्रीलंका तथा नेपाळ येथुन पू. भिक्खु संघ उपस्थित राहणार आहे. या दोन दिवसीय धम्म परिषदेचे उद्घाटन श्रीलंका येथील पू. भदंत दोडंगपहाल सुगूण महाथेरो यांच्या हस्ते तर धम्म ध्वजारोहन पू. भदंत सद्धालोका महाथेरो, श्रीलंका यांच्या हस्ते संपन्न होणार आहे. धम्म परिषदेनिमित्त दरवर्षी प्रकाशित होणा-या ‘संबोधी २०२०’ चे प्रकाशन पू. भदंत उदयभद्र थेरो, नेपाळ यांच्या हस्ते होणार आहे.  

येथे क्लिक करा - अखेर नांदेडला मिळाला विरोधी पक्षनेता

धम्म प्रवचन, सामुहीक मंगल परिणय

बौद्ध जीवन मार्ग, जातक कथाएँ एवं बौद्ध धम्म, अष्टांगिक मार्ग आदी विषयांवर देश- विदेशातील  पू. भिक्खू संघाद्वारे धम्म प्रवचने होणार आहेत. तद्वतच वधू- वर परीचय मेळावा, सामुहीक मंगल परिणय, व्यसनमुक्ती प्रतिज्ञा, धम्मज्ञान चाचणी स्पर्धेतील विजयी मुलांना पुरस्कार ईत्यादी कार्यक्रम होणार आहेत.
या धम्म परिषदेच्या निमित्ताने गरजूंसाठी मोफ़त आरोग्य शिबीर तसेच इतर प्रासंगिक कार्यक्रमांचेही आयोजन करण्यात आले आहे. धम्म परिषदेतील या सर्व कार्यक्रमांचा लाभ घ्यावा, असे आवाहन परिषदेचे संयोजक डॉ. एस. पी. गायकवाड यांनी केले आहे.