लातूर : राज्यात सुरू असलेल्या सिंहासनाच्या रस्सीखेचीत आम्हाला कशाला ओढता, आम्ही आहोत त्या ठिकाणी ठीक आहोत, असे सांगून काँग्रेसचे माजीमंत्री, आमदार अमित देशमुख यांनी त्यांच्या भारतीय जनता पक्षामधील प्रवेशाच्या चर्चेला एक प्रकारे पूर्णविराम दिला आहे.

दुसऱ्या लातूर आंतरराष्ट्रीय चित्रपट महोत्सवाचे उद्‌घाटन गुरुवारी (ता.१५) डॉ. जब्बार पटेल यांच्या हस्ते झाले. यावेळी भारतीय जनता पक्षाचे खासदार सुधाकर शृंगारे आणि राष्ट्रवादी काँग्रेसचे आमदार विक्रम काळे यांची प्रमुख उपस्थिती होती. गेल्या काही दिवसांपासून राज्यात सुरू असलेल्या राजकीय महानाट्यात आमदार अमित देशमुख व आमदा धीरज देशमुख भारतीय जनता पक्षात जाणार असल्याच्या चर्चा रंगत आहेत.

हाच धागा आमदार काळे यांनी आपल्या भाषण घेतला. आमदार अमित देशमुख यांना घेऊन जायला आलो आहोत, अशी सुरुवातच त्यांनी केली. एका बाजूला मी बसलो आहे, तर दुसऱ्या बाजूला खासदार बसले आहेत. राज्यात सुरू असलेल्या महानाट्यात गेल्या काही दिवसांपासून आमचे डोळे मुंबईकडे लागले आहेत. आमदार देशमुख यांच्या नावाची जोरदार चर्चा सुरू आहे. त्यामुळे आम्ही हार घेऊन उभे आहोत. योग्य वेळी योग्य निर्णय घेतला तर योग्य लाभ मिळतो. तुम्ही आमच्यासोबत आला तर अधिक आनंद होईल असे आमदार काळे म्हणाले.

त्यानंतर खासदार शृंगारे यांचे भाषण झाले. देशाला पुढे नेण्यासाठी तुमच्यासारख्या चांगल्या नेत्यांची गरज आहे. त्यामुळे तुम्ही चांगला निर्णय घ्याल, आम्ही तुमचे स्वागत करू. तुमच्यासोबत आम्हालाही पुढे जाता येईल. तुम्ही तसा निर्णय घेतला तर दिवंगत नेते विलासराव देशमुख यांना देखील चांगले वाटेल असे खासदार शृंगारे म्हणाले. त्यानंतर आमदार देशमुख यांचे भाषण झाले. डॉ. जब्बार पटेल यांच्या काळातील ‘सिंहासन’ वेगळे होते.

आजच्या काळातील सिंहासन वेगळे आहे. आजचे सिंहासन हे साखळीने बांधलेले आहे. या सिंहासनाच्या रस्सीखेचीत आम्हाला कशाला ओढता, आम्ही जेथे आहोत तेथे ठीक आहोत असे देशमुख म्हणाले. त्यात आमदार काळे यांनी लगेच तुम्ही फक्त ठीक आहात, समाधानी नाहीत अशी कोटी बसूनच केली. यावर देशमुख यांनी सध्या सुखी, समाधानी, समृद्धी सर्वकाही तुम्हीच आहात, तुम्हाला सदिच्छा असे म्हणत सुरू असलेल्या पक्ष प्रवेशाच्या चर्चेला एक प्रकारे पूर्णविराम दिला.