बीड : जिल्ह्यात अतिवृष्टीने झालेल्या नुकसानीचे गंभीर परिणाम समोर येत आहेत. अतिवृष्टीच्या नुकसानीने हाती काहीच पडणार नसल्याने कुटुंबाचा गाडा कसा चालवायचा या विवंचनेतून अल्पभूधारक शेतकऱ्याने विष प्राशन करून आत्महत्या केल्याची घटना रविवारी (ता. २४) समोर आली.

दिलीप शेषेराव शेजाळ (रा. कवडगाव, बु. ता. वडवणी) असे या शेतकऱ्याचे नाव आहे. दिलीप शेजाळ यांनी शेतातील पिकांकडे नजर टाकली आणि शनिवारी (ता. २३) निराश होऊन शेतातच विष प्राशन केले. त्यांना उपचारासाठी बीड येथील जिल्हा रूग्णालयात दाखल केले. मात्र उपचार सुरू असताना रविवारी त्यांचा मृत्यू झाला.

त्यांच्यासह पत्नी, दोन लहान मुले, एक मुलगी असा परिवार दुसऱ्यांच्या शेतात काम करून संसाराचा गाढा चालवीत होते. मात्र, यावर्षी निसर्गानेही आपली अवकृपा केली अन् होत्याचे नव्हते झाले. शेतात पेरलेले पीक या अतिवृष्टीने वाहून गेले. त्यातच कर्जाचा बोजा डोक्यावर आता हे कर्ज कसे फेडायचे, वर्षभर संसार कसा चालवायचा या विवंचनेत ते सतत होते. दरम्यान, त्यांनी आठवडाभरापूर्वीच १२ ऑक्टोबरला विष प्राशन केले होते. मात्र, कुटुंबातील सदस्यांनी त्यांना तातडीने उपचारासाठी बीड येथे आणले होते. तीन दिवस उपचारानंतर दसऱ्याच्या दिवशी बरे होऊन ते परत आपल्या घरी परतले. मात्र, मनात असलेली निराश त्यांना सोडत नव्हती. पुन्हा त्यांनी विष पिऊन आत्महत्या केली. या प्रकरणी रूग्णालयाच्या पोलिस चौकीत मृत्यूची नोंद करण्यात आली आहे.