जालना -  लॉकडाउन काळात शेतकरीवर्ग संकटात सापडला आहे. शेतीमाल, भाजीपाला व फळे यांना थेट ग्राहकांपर्यंत पोहोचविण्यासाठी ‘फार्म टू किचन’ ॲप तयार करीत घरपोच सेवा सुरू करण्यात आली आहे. चार दिवसांत जालनेकर नागरिकांचा प्रतिसाद मिळत आहे. 

कोरोनाच्या पार्श्वभूमीवर सध्या संचारबंदीही वाढलेली आहे. तर दुसरीकडे शेतकरीवर्ग मात्र हैराण झाला आहे. शेतातील माल, भाजीपाला व फळे यांना बाजारपेठ उपलब्ध व्हावी आणि शेतकरीवर्गाचे होणारे नुकसान टाळता येऊ शकते असा विचार मनात घेत खरपुडी (ता. जालना) येथील कृषी विज्ञान केंद्र, जिल्हा परिषद कृषी विभाग यांच्या मार्गदर्शनाखाली जालन्यातील प्रवीण घनघाव या युवकाने ‘फार्म टू किचन’ हे ॲप तयार केले आहे. चार दिवसांपासून ऑनलाइन पद्धतीने बुकिंग केल्याशिवाय घरपोच सेवा दिली जात नाही. 

हेही वाचा : द्राक्षे लगडली; पण विकावी कोठे?

सध्या सोशल डिस्टन्सिंग नियम पाळणे सक्तीचे असल्याने शेतीमाल, भाजीपाला व फळे यांचे नुकसान होऊ नये, यासाठी शेतकरीवर्गाकडून याला अधिक पसंती मिळत आहे. ग्राहकाने या संकेतस्थळावर किंवा लिंकवर आपली माहिती भरायची आहे. यानुसार कोणती भाजी वा फळांची मागणी करायची यावर क्लिक करायचे. ऑनलाइन नोंदणी केल्यावर दुसऱ्या दिवशी ग्राहकांना भाजीपाला व फळे घरपोच दिली जातात. यासाठी वेबसाइट, ॲप, फेसबुक व इन्स्टाग्राम लिंकवर माहिती भरणे आवश्यक आहे. जालना तालुक्यातील विविध गावांतील शेतकरी यासाठी आपला भाजीपाला व फळे एकाच ठिकाणी जमा करतात. जशी मागणी असेल तसा पुरवठा केला जातो. यामुळे शेतकरीवर्गाला एक चांगला पर्याय उपलब्ध झाला आहे.

हेही वाचा :  लॉकडाऊनमध्ये मजुरांच्या हाताला मिळणार काम

या ॲपमुळे जालनेकर नागरिकांची घरपोच सेवा उपलब्ध होत असल्याचे डॉ. यशवंत सोनुने यांनी सांगितले आहे. नोंदणी केल्यावर ग्राहकांना सकाळी आठ ते दहा आणि दुपारी सहा ते आठ या वेळेत घरपोच भाजीपाला व फळे दिली जातात. खरपुडी (ता. जालना) येथील कृषी विज्ञान केंद्र, जिल्हा परिषद कृषी विभाग यांच्या मार्गदर्शनाखाली या ‘फार्म टू किचन’ चे नियोजन चालते. 

शेतकरीवर्गाला यामुळे फायदा होत आहे. भाजीपाला फळे थेट ग्राहकांना पोहोचविले जातात. अनेक शेतकरी यांच्याशी जोडलेले आहेत. 
- प्रवीण घनघाव, 
सर्वज्ञ फुड्‍स, जालना