आष्टी (बीड:) तालुक्यात कोरोनाचा प्रादुर्भाव कमी करण्यासाठी महसूल आरोग्य व पोलिस प्रशासन सर्वतोपरी प्रतिबंधक उपाययोजना राबवत आहे. पण, आष्टी व कडा या शहरात मात्र शासन नियमावलीचे व्यावसायिक व काही दुकानदार सर्रास उल्लंघन करीत असून, कोरोनाच्या नियमांची पायमल्ली करताना दिसून येत आहेत. अत्यावश्यक सेवांच्या व्यतिरिक्त काही व्यावसायिकांनी दुकानाची अर्धे शटर उघडून अक्षरश: बाजार मांडला आहे. त्यामुळे लॉकडाउनमध्ये ही ठिकठिकाणी गर्दी होताना दिसत असून, कोरोनाला आमंत्रण मिळत आहे.

आष्टी तालुक्यात कोरोना विषाणूचा प्रादुर्भाव वाढत असल्यामुळे बाधित रुग्णांचा आकडादेखील बेशिस्त नागरिकांच्या वर्तनामुळे कमी होताना दिसत नाही. कोरोना विषाणूच्या प्रादुर्भावाला आळा घालण्यासाठी आरोग्य, महसूल व पोलिस प्रशासन सर्वतोपरी प्रतिबंधक उपाययोजना करीत आहेत. मात्र, काही नागरिकांसह काही व्यापाऱ्यांकडून अपेक्षित प्रतिसाद मिळत नाही. त्यामुळे आष्टी व कडा येथे लॉकडाउन असूनही अत्यावश्यक सेवेच्या व्यतिरिक्त अनेक दुकानदार राजरोसपणे तोंडाला मास्क न लावता दुकानाचे अर्धे शटर उघडून पैसे गोळा करीत आहेत.

त्यामुळे बाजारपेठेत सकाळपासूनच अपेक्षेपेक्षा अधिक गर्दी होऊ लागली आहे. त्यामुळे कोरोनाचा प्रसार होण्यास अनुकूल वातावरणाची निर्मिती होत असल्यामुळे कोरोना बाधित रुग्णांची संख्या वाढण्याची भीती आरोग्य विभागाकडून व्यक्त करण्यात येत आहे. नियमांचे उल्लंघन करणाऱ्यांवर गुन्हे दाखल करून दंडात्मक कारवाई करण्याची मागणी होत आहे.

अन् पळापळ सुरू झाली

कडा येथील डॉ. बाबासाहेब आंबेडकर चौक ते मार्केटयार्ड व केरूळ रोड परिसरात तसेच मुख्य बाजारपेठ परिसरात नागरिकांनी मोठ्या प्रमाणात गर्दी केली होती. याची माहिती आष्टीचे नायब तहसीलदार प्रदीप पांडुळे यांना समाजताच त्यांनी कडा येथे धाव घेतली. तहसीलचे पथक पाहताच नागरिकांची पळापळ सुरू झाली.