छत्रपती संभाजीनगरमधील वाळुज एमआयडीसी परिसरातल्या एका कंपनीला लागलेल्या भीषण आगीमध्ये सहा जणांचा मृत्यू झाला आहे. वाळूज औद्योगिक वसाहतीतील सी सेक्टर प्लॉट नंबर २१६ मध्ये 'सनशाइन इंटरप्राईजेस' कंपनीत रविवारी ही घटना घडली आहे. मृत्यूमुखी पडलेले कामगार बिहार राज्यातील आहेत.

घटनास्थळी पोहचलेल्या अग्निशमन विभागाच्या अधिकाऱ्यांनी सांगितलं की मोठ्या पयत्नानंतर आगीवर नियंत्रण मिळवण्यात आलं. मिळालेल्या माहितीनुसार फॅक्टरीमध्ये आग मध्यरात्री 2.15 मिनीटांनी लागली होती, आता फॅक्टरीतून सहा मृतदेह बाहेर काढण्यात आले आहेत.

अग्निशमन अधिकारी, मोहन मुंगसे यांनी एएनआयला सांगितलं की, आम्हाला सकाळी २.१५ मिनीटांनी एक कॉल आला होता, जेव्हा आम्ही घटनास्थळी पोहचलो तेव्हा संपूर्ण फॅक्टरीला आग लागली होती. स्थानिक लोकांनी दिलेल्या माहितीनुसार सहा लोक आतमध्ये अडकले होते, आमच्या अधिकाऱ्यांनी आत जाऊन सहा लोकांचे मृतदेह बाहेर काढले आहेत.

यापूर्वी स्थानिकांकडून इमारतीत पाच लोक अडकल्याचा दावा करण्यात येत होता, अग्निशमन विभागाच्या अधिकाऱ्यांनी सांगितले की, आग लागल्याच्या घटनेत सहा लोकांचा मृत्यू झाला आहे, कामगारांनी सांगितलं की जेव्हा आग लागली तेव्हा कंपनी बंद होती. दरम्यान या आगीचं कारण अद्याप अस्पष्ट आहे.