आडुळ (औरंगाबाद): ओव्हरटेक करीत असताना समोर असलेल्या ट्रकला पाठीमागून दुचाकी धडकल्याने दुचाकीस्वार ठार झाल्याची घटना बुधवारी (ता.९) औरंगाबाद-सोलापूर राष्ट्रीय महामार्गावरील (Aurangabad-solapur nh) थापटीतांडा (ता.पैठण) शिवारात घडली. याबाबत पाचोड पोलिसांनी दिलेल्या माहितीनुसार, परमेश्वर दिना राठोड वय ३६ वर्षे, राहणार पाचेगाव (ता.गेवराई जिल्हा बिड) हे दुचाकी क्रमांक एमएच २३ बीए ७४०७ ने औरंगाबादहुन पाचेगावकडे जात असताना महामार्गावरील थापटीतांडा शिवारातील गुगळादेवी मंदिर जवळ एका वाहनाला ओव्हरटेक करीत होते. त्यांच्या समोर चालत असलेल्या ट्रकला पाठीमागून दुचाकी धडकली. यात ते गंभीर जखमी झाले होते.

अपघाताची माहिती मिळताच नॅशनल हायवे ऑथॉरिटी ऑफ इंडियाची १०३३ या रुग्णवाहिकेचे डॉ. महेश जाधव, आत्माराम गाढेकर, रवी गाढे यांनी तत्काळ घटनास्थळी धाव घेवुन जखमीला पुढिल उपचारासाठी औरंगाबाद येथे हलविले. मात्र रस्त्यातच परमेश्वर राठोड यांचा मृत्यू झाला. पाचोड पोलीस ठाण्याचे गोरक्षनाथ कनसे, यांनी घटना स्थळी धाव घेवुन पंचनामा केला. या अपघाताची नोंद पाचोड पोलीस ठाण्यात घेण्यात आली. पुढील तपास ठाण्याचे सहाय्यक पोलीस निरीक्षक गणेश सुरवसे यांच्या नेतृत्वाखाली गोरक्षनाथ कनसे करीत आहे.

परमेश्वर राठोड यांचे साडु आजारी असून त्यांच्यावर औरंगाबाद येथील एका खासगी रुग्णालयात शस्त्रक्रिया करण्यात आलेली आहे. त्यांचा जेवणाचा डबा देऊन परत येत असताना काळाने त्यांच्यावर घाला घातला. त्यांच्या पश्चात पत्नी, दोन मुली, एक मुलगा असा परिवार असून घरातील कर्ता पुरुषच गेल्याने राठोड कुटुंबावर दुखा:चा डोंगर कोसळला आहे.