छत्रपती संभाजीनगर : खरीप हंगामाची लगबग सुरू झाली आहे. कृषी विभागाच्या वतीने विद्यापीठाच्या वतीने शिफारस केलेल्या बियाणांचा पुरवठा करण्यात येत असून सोमवार ( ता.२९ ) पासून पैठण रोडवरील विभागीय कृषी विस्तार शिक्षण केंद्रात शेतकऱ्यांना तूर बीडीएन - ७११ वाणाच्या विक्रीस प्रारंभ झाला आहे.

पैठण रोड वरील विस्तार कृषी विस्तार शिक्षण केंद्रात खरीप बियाणे विक्रीप्रसंगी प्रथम एकत्र आलेले दोन शेतकरी श्रीराम कोरडे आणि रमेश सादरे यांचा सत्कार केंद्राच्या वतीने आणि जिल्हा सरकारी वकील नामदेवराव बोराडे यांच्या हस्ते करण्यात आला. यावेळी राष्ट्रीय कृषी संशोधन प्रकल्पाचे कृषी शास्त्रज्ञ डॉ. सी. बी. पाटील, सेवानिवृत्त तालुका कृषी अधिकारी सोनवणे, कृषी तंत्र विद्यालयाचे दत्ता मुळे उपस्थित होते.

विभागीय कृषी विस्तार शिक्षण केंद्राचे रामेश्वर ठोंबरे यांनी वसंतराव नाईक मराठवाडा कृषी विद्यापीठाच्या वतीने विक्रीसाठी उपलब्ध झालेल्या बियाणांची माहिती दिली. यात बियाणे पॅक, किंमत, पिकाच्या वाणाची वैशिष्ट्ये आदी माहिती उपस्थित शेतकऱ्यांना देण्यात आली. सोमवारी सकाळी नऊ वाजेपासून सायंकाळी पाच वाजेपर्यंत शंभरपेक्षा अधिक बीडीएन - ७११ या तूर वाणाच्या बॅगांची विक्री झाली. खरेदी करतेवेळी अनेक शेतकऱ्यांनी तूर पिकाचा गत हंगाम हा आम्हाला चांगला गेला. उत्पन्न आणि भावही समाधानकारक मिळाला, असे सांगितले.

माफक दरात बियाणे

यंदाही आम्ही आम्ही या वाणाचे तुरीच्या क्षेत्रात वाढ करणार आहोत, असे आवर्जून सांगितले. विभागीय कृषी विस्तार शिक्षण केंद्र, औरंगाबादचे प्रभारी रामेश्वर ठोंबरे यांनी आभार व्यक्त करून यंदा मोठ्या प्रमाणावर बीडीएन - ७११ तूर बियाणे माफक दरात उपलब्ध करून देणार असल्याचे सांगितले.