सिल्लोड : दसरा मेळाव्यासाठी मुंबई येथील बिकेसी मैदानावर तालुक्यातून २५ हजाराहून अधिक शिवसैनिक जाणार असल्याची माहिती कृषिमंत्री अब्दुल सत्तार यांनी दिली. बुधवारी येथील शिवसेना भवन कार्यालयाच्या परिसरात आयोजित तालुक्यातील पदाधिकारी, कार्यकर्त्यांच्या आढावा बैठकीत ते बोलत होते.

मेळाव्यासाठी ३५० बसेसचे नियोजन झाले असून, मतदारसंघातून ५०० एसटी बसेसची मागणी होत असल्याचे ते म्हणाले. एकनाथ शिंदे मुख्यमंत्री झाल्यानंतर कार्यकर्त्यांमध्ये नवचैतन्य आले असून, बिकेसी मैदानावरील दसरा मेळाव्याची सभा ना भूतो ना भविष्य सभा होईल. मेळाव्यास जाण्यासाठी महिला व पुरुषांसाठी स्वतंत्र बसेसची व्यवस्था करण्यात आली आहे.

मुख्यमंत्री एकनाथ शिंदे २० तास लोकांची कामे करतात त्यामुळे विरोधकांची झोप उडाली असल्याचे श्री.सत्तार म्हणाले. मुख्यमंत्र्यांचे हात बळकट करण्यासाठी सिल्लोड-सोयगाव मतदारसंघातून प्रचंड संख्येने उपस्थित राहण्याचे आवाहन कृषिमंत्री सत्तार यांनी उपस्थित शिवसैनिकांना केले. बैठकीस शिवसेना तालुकाप्रमुख देविदास लोखंडे, केशवराव तायडे, नगराध्यक्षा राजश्री निकम, उपनगराध्यक्ष अब्दुल समीर अब्दुल सत्तार, शिवसेना उपजिल्हाप्रमुख किशोर अग्रवाल, अजीज बागवान, नंदकिशोर सहारे यांच्यासह शिवसेना पदाधिकारी, कार्यकर्ते उपस्थित होते.