कायगाव (जि.औरंगाबाद) : औरंगाबाद-पुणे महामार्गावरील (Pune-Aurangabad Highway) जुने कायगाव (ता.गंगापूर) येथे ट्रक चालकाने मोटरसायकलला पाठीमागुन उडवल्याने मोटारसायकलस्वाराचा जागीच मृत्यू झाला. ही घटना सोमवारी (ता.एक) दुपारी पावणे एकच्या दरम्यान घडली. गंगापूर पोलिसांकडून (Gangapur Police Station) मिळालेल्या माहितीनुसार औरंगाबाद-पुणे महामार्गावरील कायगाव टोका येथील जिल्हा तपासणी नाक्याजवळ औरंगाबादहून अहमदनगरकडे (Ahmednagar) गणेश रोड लाईन कंपनीचा बारा टायरचा ट्रक (एमएच १६ सीसी ७४६७) चालकाने निष्काळजीपणे वाहन चालवुन जामगाव येथुन प्रवरासंगमकडे शाईन मोटारसायकलवर बसुन जात असलेल्या प्रदीप कैलास मगर (वय २३) याला पाठीमागून धडक दिली. (Aurangabad Accident News Youth Dies In Road Accident)

या धडकेत मोटारसायकल विरुद्ध दिशेला पडली, तर प्रदीप हा. टायरच्या खाली सापडला त्याच्या पोटावरून चाक गेल्याने यात त्याचा जागीच मृत्यू झाला.तपासणी नाक्यावर असलेल्या पोलिस पोलिस नाईक संदीप डमाळे, राहुल वडमारे, गृहरक्षक रामेश्वर मंडलीक आदींनी मृतदेह उपजिल्हा रुग्णालयात शवविच्छेदनासाठी पाठविले. पोलिसांनी ट्रक व चालकाला ताब्यात घेऊन ट्रक पोलिस ठाण्यात जमा केला असून चालकावर गुन्हा दाखल करण्यात आला आहे. पुढील तपास पोलिस निरीक्षक संजय लोहकरे यांच्या मार्गदर्शनाखाली पोलिस उपनिरीक्षक दीपक औटे हे करित आहेत.