औरंगाबाद : हॉटेलात कुक म्हणून काम करणाऱ्या तरुणाने प्रेयसीच्या घरात गळफास घेऊन आत्महत्या केली. ही घटना शनिवारी (ता.१३) सायंकाळी सात वाजेच्या सुमारास न्यायनगरात उघडकीस आली. सुरुवातीला खुनासारखा वाटणारा हा प्रकार मृताच्या शवविच्छेदनानंतर आत्महत्या असल्याचे स्पष्ट झाले. मात्र, आत्महत्येचे नेमके कारण स्पष्ट होऊ शकले नाही.
अमोलराजे भाऊसाहेब चव्हाण (वय ३२, रा. विष्णूनगर, जवाहर कॉलनी) असे मृत तरुणाचे नाव आहे. तो सूतगिरणी चौक परिसरातील एका हॉटेलमध्ये कुक म्हणून काम करत होता. त्याच हॉटेलमध्ये त्याची प्रेयसीही साफसफाईचे काम करते. तेथेच त्यांची ओळख होऊन ओळखीचे रूपांतर प्रेमात झाले. ती न्यायनगरात राहते. तिचा पती दहा वर्षांपासून विभक्त राहत आहे. तिला १२ वर्षांची मुलगी आणि १४ वर्षांचा मुलगा आहे. अमोलराजे हा तिच्या घरी येत-जात होता.
दरम्यान यावरून त्यांच्यात अनेकदा वाददेखील झालेला आहे. अशी माहिती नातेवाइकांनी दिली. शनिवारी दुपारी तीन वाजता अमोलराजे हा प्रेयसीच्या न्यायनगरातील घरी गेला. तेव्हा तिचा मुलगा एकटाच घरी होता. अमोलराजे याने मुलाला घराबाहेर जाण्यास सांगितले. त्यानंतर आतून कडी लावून घेत त्याने गळफास घेतला.
संध्याकाळी सात वाजता ही घटना उघड झाली. प्रेयसीने शेजाऱ्यांच्या मदतीने दरवाजा तोडून अमोलराजे याला उपचारासाठी घाटी रुग्णालयात नेले, मात्र डॉक्टरांनी त्याला तपासून मृत घोषित केले. याप्रकरणी आकस्मिक मृत्यूची नोंद करण्यात आली आहे. अधिक तपास जमादार राठोड करीत आहेत, अशी माहिती सहायक निरीक्षक शेषराव खटाने यांनी दिली.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.