औरंगाबाद : चोराखळी (ता. कळंब) येथील नवले कुटुंबावर नियतीने क्रूर घाला घातला आहे. महिन्याभरात एकाच कुटुंबातील चौघांचे निधन झाले आहे. आई, वडील आणि भाऊ गमावल्यानंतर उद्योजक सुनिल नवले (Industrialist Sunil Nawale) यांचे रविवारी (ता.नऊ) सकाळी साडेदहा वाजता पुणे येथे निधन झाले आहे. डॉ.बाबासाहेब आंबेडकर मराठवाडा विद्यापीठातील (Babasaheb Ambedkar Marathwada University) हिंदी विभागातील प्राध्यापक डॉ. संजय माणिकराव नवले (Professor Sanjay Nawale) यांचे १५ एप्रिलला कोरोनाने (Corona) निधन झाले होते. या घटनेचा धक्का बसल्यानंतर त्यांच्या आई वडिलांना पुण्यातील रूग्णालयात दाखल करण्यात आले. उपचार सुरू असतानाच माणिकराव नवले (वय ८०) मंदाकिनी नवले (वय ७८) यांनी २३ एप्रिलला सायकांळी दोन तासाच्या अंतराने प्राण सोडला. (Aurangabad Live Updates Industrialist Sunil Nawale Dies In Pune)

दरम्यान, डॉ. नवले यांचे बंधू सुनील नवले (वय ५१) यांनाही धक्का बसल्याने पुण्यातील रूग्णालयात दाखल करण्यात आले. यावेळी कोरोनाची लागण झाली. रविवारी (ता. नऊ) सकाळी त्यांचाही मृत्यू झाला. त्यांच्या पश्चात भाऊ प्रा. अरविंद नवले (उदगीर), पत्नी, मुलगा, दोन मुली असा परिवार आहे. पुणेस्थित हनीवेल कंपनीत बिझनेस हेड या पदावर ते कार्यरत होते. चोराखळी गावावर या घटनेने शोककळा पसरली आहे. शुन्यातून विश्व उभा करणाऱ्या चौघांचा २५ दिवसाच्या आत मृत्यु झाला आहे. डॉ. नवले कुटुंबियांच्या दु:खात विद्यापीठातील सर्वजण सहभागी आहोत, असे कुलगुरु डॉ. प्रमोद येवले यांनी शोकसंदेशात म्हटले आहे.