लासूर स्टेशन : लासूर स्टेशन (ता.गंगापूर) येथील महावीर नगरातील एका घराचे कुलूप तोडून मंगळवारी (ता.४) भरदिवसा दुपारी १२ वाजता अज्ञात चोरट्यांनी सोने, चांदीचे दागिने व रोख रक्कम असा एकूण १लाख ६१ हजार ९०० रुपयांचा ऐवज लंपास केला. या घटनेमुळे नागरिकांनी पोलिसांच्या कार्यक्षमतेवर प्रश्न उपस्थित केला आहे.

शिल्लेगाव पोलिसांनी सांगितले की, फिर्यादी प्रा.अशोक म्हस्के यांच्या घरी चोरी झाली. दुपारी बारा वाजेचे दरम्यान लासूरगाव रस्त्यावर असणाऱ्या महावीरनगर परिसरातील प्रा.म्हस्के हे घर बंद कुटुंबीयांसह बाहेर गेले होते. त्याचवेळी चोरट्यांनी डाव साधला. बंद घराचे कुलूप तोडून चोरट्यांनी कपाटातील नगदी आणि सोने, चांदीचे दागिने असा एकूण १,६१,९०० रुपयांचा ऐवज चोरून नेला आहे.

याबाबत माहिती मिळताच शिल्लेगाव पोलिसांनी घटनास्थळी धाव घेऊन श्वान पथक, ठसे तज्ञांना पाचारण केले. मात्र, चोरट्यांचा शोध लागला नाही. पोलिसांनी आजूबाजूचे सीसीटीव्ही तपासून शोध घेणे सुरु केले असून शिल्लेगाव पोलिस ठाण्यात गुन्हा दाखल करण्यात आला आहे. शिल्लेगावचे पोलिस निरिक्षक मच्छिंद्र सुरवसे यांच्या मार्गदर्शनाखाली फौजदार शेख तपास करीत आहेत.