औरंगाबाद: लग्नाच्या दोन महिन्यांत नव्या संसाराची स्वप्न घेऊन शहरात आलेल्या सुचिताला मात्र सासरी पोषक वातावरण न मिळाल्याने नैराश्‍य आले. वरचेवर नैराश्‍यात बुडालेल्या सुचिताने आत्महत्येचा टोकाचा निर्णय घेत भल्या पहाटेच घर सोडलं, काळ आला होता; पण वेळ आली नव्हती या उक्तीनुसार दामिनी पथकाने धाव घेतली अन् सुचिताचा जीव वाचविला. तिला त्रास देणाऱ्या नणंद, सासूचे समुपदेशन करत तिला पुन्हा नांदायला पाठविले.

वीटभट्टीवर कामगार असलेल्या दांपत्याची १९ वर्षीय सुचिता हर्सूल परिसरात राहते. लग्नानंतर दोन महिन्यांनी सुचिता आणि सुगंध (नाव बदललेलं आहे) दोघे राहू लागले. पतीचा काडीमात्र त्रास नाही, मात्र नणंद, सासूशी सुचिताचे पटत नसे. त्या दोघी एकत्र राहत असत, मात्र सुचिताशी त्या पटवून घेत नसत. यातून तिला नैराश्‍य येत गेले.

कोरोनाकाळातही मंडईत खरेदीसाठी 'तोबा' गर्दी! जिल्हाधिकाऱ्यांचे आदेश...

पहाटे पाचलाच घराबाहेर पडली-
सकाळी सकाळी ती हर्सूल तलावावर पोचली. तिची अवस्था चंद्रकला राठोड या जागरूक महिलेने हेरली आणि दामिनी पथकाच्या इन्चार्ज पोलिस उपनिरीक्षक स्नेहा करेवाड यांना संपर्क केला. करेवाड यांनी तत्काळ हर्सूल गाठले. दरम्यान, सुचिताचे दीर, सासू तिला शोधत होत्या. सुचिताला सोबत घेऊन करेवाड पथकासह तिच्या घरी गेल्या. नंतर करेवाड यांनी सासूचा ‘क्लास’ घेत चार गोष्टी समजावूनही सांगितल्या. सुचिताच्या वडिलांशीही फोनवर बोलल्या. यातून सर्वांनाच हायसे वाटले. ही कारवाई दामिनी पथकाच्या करेवाड यांच्यासह अंमलदार लता जाधव, आशा गायकवाड, साक्षी संगमवाड यांच्या चमूने केली.

औरंगाबाद शहरात मध्यरात्री माथेफिरूचा तिघांवर हल्ला, हल्ल्यात एकाचा मृत्यू तर...

तिला नवऱ्याचा काही त्रास नव्हता, पण नणंद, सासूशी पटत नव्हतं त्यांच्यातला अबोला वाढतच गेला अन सुचिताने स्वतःला संपविण्याचा निर्णय घेतला होता. नणंद, सासूसह तिचेही समुपदेशन केले आहे. ती आनंदात नांदायला गेली आहे.
-स्नेहा करेवाड, पोलिस उपनिरीक्षक, इन्चार्ज दामिनी पथक