औरंगाबाद : तोंडोळी (ता. पैठण) शिवारात दरोडा टाकून अत्याचार केल्याप्रकरणात आणखी दोघांना सोमवारी (ता.२५) ताब्यात घेण्यात आले. विशेष म्हणजे १९ ऑक्टोबररोजी घटना घडल्यानंतर दोन दिवसांनी म्हणजेच २१ ऑक्टोबररोजी मुख्य सुत्रधारास बेड्या ठोकण्यात आल्या होत्या. अटक केलेले दोघे मुख्य सुत्रधाराचे विश्वासू साथीदार असून त्यांना अटक करण्यात आली आहे. त्या तिघांनाही पैठण न्यायालयाने २८ ऑक्टोबरपर्यंत पोलिस कोठडी सुनावली आहे.

आता या प्रकरणात एकूण ५ जणांना पोलिसांनी बेड्या ठोकल्या आहेत. पोलिसांनी तपासासाठी एकूण ११ पथके स्थापन केली होती. सध्या सहा पथके तैनात असून त्यामध्ये ४ खास पथकांचा समावेश आहे. पैठण उपविभागीय पोलिस अधिकारी डॉ. विशाल नेहूल हे अधिकारी दिवसरात्र या तपासाकामी पथकांना मार्गदर्शन करत आहेत.

दरम्यान खास पथकाने सोमवारी (ता.२५) दोघांना बेड्या ठोकल्या. नंदू भगिनाथ बोरसे (३५, रा. पालखेड, ता.वैजापूर) आणि अनिल भाऊसाहेब राजपूत (२९, मांजरी, ता. गंगापूर) अशी त्या दोघांची नावे आहेत.

मराठवाड्यात धुमाकूळ

तोंडोळी प्रकरणातील आरोपींनी अत्याचार केल्याचे समोर आले खरे, मात्र या टोळीने मराठवाड्यातही दरोडे टाकून धुमाकूळ घातल्याची माहिती मिळाल्याचे सुत्रांनी ‘सकाळ’शी बोलताना सांगितले. या आरोपींनी मराठवाड्यात तब्बल १५ ठिकाणी दरोडे टाकले आहेत. सर्व आरोपी अटक झाल्यानंतर त्यांच्याकडून आणखी माहिती उघड होईल, असेही सुत्रांनी सांगितले.

वैर असलेल्यांची सांगतात नावे!

या प्रकरणातील आरोपी इतके चतूर आहेत की, पोलिसांनी ताब्यात घेतल्यानंतर नाव, गाव विचारल्यानंतर खरी माहिती देत नाही, तर चक्क आरोपींचे ज्या व्यक्तींशी वैर आहे, त्यांचेही नावे सांगितल्याचे समोर आले आहे. त्यामुळे संशयितांना ताब्यात घेतल्यानंतर निष्पन्न झाल्यानंतरच अटकेची कारवाई करण्यात येत असल्याचे सुत्रांनी सांगितले.

अशी आहे अटकेची मालिका

२१ ऑक्टोंबर - प्रभू श्माम पवार याला अटक

२२ ऑक्टोबर - विजय प्रल्हाद जाधव

२४ ऑक्टोंबर - सोमनाथ बाबासाहेब राजपूत

(तिघा आरोपींना २८ ऑक्टोंबरपर्यंत पोलिस कोठडी सुनावण्यात आली आहे)

२५ ऑक्टोंबर - नंदू भगिनाथ बोरसे आणि अनिल भाऊसाहेब राजपूत