औरंगाबाद : शालेय स्तरावर २०२०-२१ या शैक्षणिक वर्षापासून विद्यार्थ्यांच्या दप्तराचे ओझे कमी करण्यासाठी प्रयत्न केले आहेत. त्यासाठी मराठी माध्यमाच्या पहिली ते पाचवी गणित व विज्ञान हे विषय शिकणाऱ्या विद्यार्थ्यांसाठी बालभारतीने द्विभाषिक पाठ्यपुस्तकांची निर्मिती केली असून, यामुळे विद्यार्थ्यांच्या पाठीवरील दप्तराचे ओझे कमी होण्यास मदत होणार आहे. 

शालेय स्तरावरील विद्यार्थी हा फक्त ज्ञानसंपन्न असून चालणार नाही, तर तो शारीरिकदृष्ट्या सुदृढ असणे आवश्यक आहे. प्रमाणापेक्षा अधिक वजनाचे दप्तर वाहणाऱ्या विद्यार्थ्यांमध्ये पाठदुखी, स्नायू आखडणे, मणके झिजणे, मान दुखणे, फुप्फुसांची कार्यक्षमता कमी होणे, डोकेदुखी, मानसिक ताण असे अनेक आजार, विकार होत आहेत. बालवयात जडणाऱ्या या आजारांमुळे विद्यार्थ्यांचे भविष्य धोक्यात येऊ शकते.

हेही वाचा : कर्तव्य निभावताना हवे जबाबदारीचे भान   
 
शालेयस्तरावर शिक्षण घेणाऱ्या विद्यार्थ्यांच्या दप्तरामध्ये पाठ्यपुस्तकांचेही वजन नेमके किती असावे याबाबतची स्पष्टता दिली आहे. या संकल्पनेतूनच शासनामार्फत शालेय स्तरावरील अध्ययन अध्यापन प्रक्रियेसाठी एकात्मिक पाठ्यपुस्तकाची योजना प्रस्तावित होती. सर्व पाठ्यपुस्तके एकत्र सोबत घेतल्यामुळे साहजिकच दप्तराच्या ओझ्यामध्ये वाढ होत आहे. यामुळे वर्गामध्ये जो विषय शिकवला जात आहे, तेवढेच अध्ययन साहित्य सोबत नेता यावे, यासाठी शासनामार्फत एकात्मिक पाठ्यपुस्तक प्रकल्प तयार केला आहे.

हेही वाचा : कोरोनाबद्दल साहित्यिक म्हणतात.. 

यात प्रत्येक विषयाच्या पाठ्यपुस्तकाचे तीन भाग करून सर्व विषयांच्या पाठ्यपुस्तकांचे एकात्मिक स्वरूपात तीन स्वतंत्र भागामध्ये पाठ्यपुस्तक तयार करण्यात येत आहे. त्यामुळे वेळापत्रकाप्रमाणे सर्व विषयांचे एकच पाठ्यपुस्तक सहज सोबत शाळेत घेऊन जाणे विद्यार्थ्याला शक्य होईल. इयत्ता पहिली ते पाचवी विषयांची संख्या कमी असल्यामुळे तीन भाग करण्यात आले. इयत्ता सहावी व सातवीसाठी विषयांची संख्या जास्त असल्याने आवश्यकतेनुसार चार भाग केले जातील. शालेय विद्यार्थी हा शारीरिक व मानसिकदृष्ट्या सक्षम ठेवण्यासाठी हा एकात्मिक पाठ्यपुस्तकांचा पथदर्शी प्रकल्प तयार करण्यात आला आहे. 

हेही वाचा : कोरोनाबद्दल साहित्यिक म्हणतात.. 

अध्ययन होणार सोपे 
गणित, विज्ञान या विषयांचे मराठी माध्यमातून अध्ययन होत असताना जर विद्यार्थ्यांना गणितीय आणि वैज्ञानिक संकल्पनांचे अर्थ जर इंग्रजीतून कळाले आणि त्याविषयी शिक्षकांनी अध्यापन करताना थोडे स्पष्टीकरण केले तर विद्यार्थ्यांचे अध्ययन सहज सोपे होईल. त्यातूनच गणित व विज्ञान या प्राथमिक स्तरावरील मराठी माध्यमाच्या पाठ्यपुस्तकांचे द्विभाषीकरण करावे, असा निर्णय शासन स्तरावर प्रस्तावित करण्यात आला होता. शालेय वर्ष २०२०-२१ पासून इयत्ता पहिली ते सातवीच्या मराठी माध्यमाकरिता हा प्रकल्प राज्यातील ५९ ब्लॉक्समध्ये पथदर्शी स्वरूपात राबविण्यात येणार आहे.