औरंगाबाद : महिनाभरावर लग्न (wedding) आलेले असताना बेरोजगारीला(unemployment) कंटाळून २६ वर्षीय तरुणाने राहत्या घरात दोरीने गळफास घेत आत्महत्या(sucide) केली. हा प्रकार रविवारी (ता.१९) दुपारी चारदरम्यान उघडकीस आला. रामेश्वर हरिभाऊ धनगे (२६ वर्षे, रा. हर्सूल परिसर, मूळ रा. कन्नड) असे आत्महत्या केलेल्या तरुणाचे नाव आहे. याप्रकरणी रामेश्वर याच्या नातेवाईकांनी दिलेल्या माहितीनुसार, त्याने कन्नड तालुक्यातील एका महाविद्यालयातून पदवीपर्यंतचे(college degree) शिक्षण पूर्ण केले होते. मागील तीन ते चार वर्षापासून तो शहरात अभ्यास करत नोकरीच्या शोधात आला होता. दरम्यान, हर्सूल परिसरात किरायाची खोली करून तो राहत असे.

खर्च भागवण्यासाठी मिळेल ते काम तो करत होता. मृत रामेश्वरचे लग्न ठरलेले होते. त्याचे लग्न २२ जानेवारी २०२२ रोजी होणार होते. मात्र नोकरी नसल्याने तो तणावात होता. या तणावातूनच रविवारी त्याने राहत्या खोलीत नायलॉन दोरीच्या सहाय्याने गळफास घेतला. ही बाब शेजारी राहणाऱ्याच्या लक्षात येताच रामेश्वर याला तात्काळ घाटी रुग्णालयात दाखल करण्यात आले असता, वैद्यकीय अधिकाऱ्यांनी रामेश्वरला तपासून मृत घोषित केले. बेरोजगारीला कंटाळून रामेश्वरने आत्महत्या केली असावी असा अंदाज नातेवाईकांनी व्यक्त केला आहे.या प्रकरणी हर्सूल पोलिस ठाण्यात अकस्मात मृत्यूची नोंद करण्यात आली असून पुढील तपास अंमलदार देविदास गाडेकर करीत आहेत.