वाळूज (औरंगाबाद): हर्सुल कारागृहातून जामीनावर सुटलेल्या गुन्हेगाराचा अज्ञात आरोपींनी दगडाने ठेचून खून केल्याची घटना बजाजनगर (bajajnagar crime) येथे शुक्रवारी (ता.२१) रात्री १० वाजेच्या सुमारास घडली. हॉटेल मृगनयनीसमोर शुक्रवारी (ता.२१) रात्री १० वाजेच्या सुमारास हाणामारी होत असल्याची माहिती वाळूज एमआयडीसी पोलिसांना मिळताच पोलिस निरीक्षक प्रशांत पोतदार, उपनिरीक्षक अधाने, पोलीस काँस्टेबल अविनाश ढगे, विनोद नितनवरे, रमेश गायकवाड, अशोक दाभाडे आदींनी घटनास्थळी धाव घेतली.

तेथे एक अनोळखी तरुण दगडाने ठेचलेल्या व रक्ताच्या थारोळ्यात बेशुद्ध पडल्याचे पोलिसांना दिसले. त्यास पोलिसांनी उपचारार्थ घाटीत दाखल केले असता डॉक्टरांनी तपासून मृत घोषीत केले. त्याचे नाव विशाल किशोर फाटे (२७) रा.वडगाव (कोल्हाटी) असे आहे. तो सराईत गुन्हेगार असून त्यांच्यावर वाळूज एमआयडीसी पोलिस ठाण्यात गंभीर स्वरुपाचे अनेक गुन्हे दाखल आहेत.

गेल्या वर्षी वडगाव (को.) येथील योगेश प्रधान या तरुणाच्या खून प्रकरणातही त्याचा सहभाग होता. तेव्हा पासून विशाल कारागृहात होता. गेल्या पंधरा दिवसांपूर्वीच विशालची जामिनावर सुटका झाल्याने तो वडगावला आला होता.